Bərbad yollar Sumqayıt sakinlərini BOĞAZA YIĞIB: Qurumlar niyə FİKİR VERMİR? - ŞİKAYƏT

Sumqayıt şəhəri, Təzə Kotej qəsəbəsi 15 - 20 ci məhəllə Mirzə İbrahimov küçəsində yol infrastruktu bərbad vəziyyətdədir.

Bu barədə Sumqayıt şəhər sakinləri Sonxeber.az-a müraciət edib. Sakinlərinin sözlərinə görə, yollar illərdir asfaltlanmadığı üçün hərəkət çətinləşir:

" Yaşadığımız ərazidə yol infrastruktu bərbad vəziyyətdədir. Yollar illərdir asfaltlanmır. Fevral ayının 9-u Sumqayıt Rayonu İcra Hakimiyyətinin qəbulunda olduq. Müavinləri göstəriş verdi ki, mart-aprel aylarında həmin küçə asfaltlansın.Onlarda problemi həll edəcəklərini dedilər. Amma heç bir şey olmadı. ".

Sakinlər bildirib ki, bir neçə dəfə quruma yenidən müraciət olunub. Lakin vətəndaşların şikayətlərinə baxılmayıb və tələbləri isə qulaqardına vururlar:

"Problem ilə bağlı tenderləri bəhanə edirlər. Yay ayları olmasına baxmayaraq yağış yağanda bu yollar keçilməz halda olur. Maşınlar bərbad vəziyyətə düşür. Sözügedən qurum ancaq şəhərin mərkəzi ilə maraqlanır. Amma kənar ərazilərə fikir vermirlər. Xəstələrimiz olur və biz onları xəstəxanaya çatdıra bilmirik. Uşaqlar məktəbə gedən zaman əziyyət çəkirlər. Şəhərin mərkəzi ilə maraqlanmaqla şəhərin problemi həll olunmur. Kənar ərazilərə diqqət yetirmək lazımdır. Hər gün nə qədər adam burdan işə, həkimə, məktəbə gedib-gəlir. Biz bu yollara görə əziyyət çəkir, düzəldilməsini xahiş və tələb edirik".

Məsələ ilə bağlı Sumqayıt şəhər İcra Hakimiyyəti ilə əlaqə saxladıq. Sorğumuza cavab olaraq Sumqayıt ŞİH-in mətbuat Katibi Eyvaz Qocayev iclasda olduğunu və problemin araşdırılacağını bildirib.

Telegramda izləyin