Əli Kərimliyə cinayət işi açıldı: Hansı cəza GÖZLƏYİR - AÇIQLAMA

Xəbər verdiyimiz kimi, AXCP sədri Əli Kərimli barəsində xüsusi ittiham qaydasında cinayət işi başladılıb. Bu barədə AXCP sədri özü bildirib. Ə.Kərimlinin sözlərinə görə, məhkəmədən göndərilmiş bildirişdə xüsusi ittihamın kim tərəfindən qaldırıldığı yazılmayıb. Sadəcə o qeyd olunub ki, xüsusi ittiham Cinayət Məcəlləsinin şəxsiyyətin azadlığı və ləyaqəti əleyhinə olan cinayətlər bölümü ilə əlaqədar qaldırılıb.

Bəs sübuta yetiriləcəyi təqdirdə Əli Kərimlini hansı cəza gözləyir? Mövzu ilə bağlı Sonxeber.az-a açıqlama verən vəkil Turan Abdullazadə bildirib ki, Azərbaycan Respublikasının Cinayət Prosessual Məcəllənin 21.1-ci maddəsinə əsasən cinayətin törədilməsində təqsirləndirilən hər bir şəxs onun təqsiri bu məcəllədə nəzərdə tutulmuş qaydada sübuta yetirilməyibsə və bu barədə qanuni qüvvəyə minmiş məhkəmənin hökmü yoxdursa, təqsirsiz sayılır. Yəni hələ ki, məhkəmənin hökmü olmadığı üçün kimisə ittiham edə bilmərik.
"Azərbaycan Respublikasının Cinayət Məcəlləsinə əsasən yalan olduğunu bilə-bilə hər hansı şəxsin şərəf və ləyaqətini ləkələyən yaxud onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, mediada yaxud internet informasiya ehtiyatlarında yayma 1000-1500 manatadək miqdarda cərimə ilə, 240 saatdan 480 saata qədər ictimai işlər, 1 ilədək müddətə islah işləri və 6 aya qədər azadlıqdan məhrumetmə ilə cəzalandırılır. Həmin maddənin ikinci maddəsinə əsasən ağır və ya xüsusilə ağır cinayətdə böhtan atma 2 ilədək islah işləri, üç ilədək azadlığın məhdudlaşdırılması və ya 3 ilədək azadlıqdan məhrumetmə ilə cəzalandırılır. Cinayət Məcəlləsinin 147 və 148-ci maddələrində nəzərə tutulmuş cəzalar bunlardır. Əgər bu maddələr üzrə ittiham olarsa və məhkəmə barəsində ittiham hökmü çıxarsa sözügedən maddələrdə nəzərdə tutulmuş cəzalar verilə bilər".

Qeyd edək ki, iş üzrə məhkəmənin hazırlıq iclası 13 avqust, saat 11:00-da Nəsimi rayon məhkəməsində olacaq.

Telegramda izləyin