Rusiya-Ukrayna, Fələstin-İsrail müharibələri Azərbaycanın atəşkəs çağırışına cavab verəcəkmi ? - AÇIQLAMA

Xəbər verdiyimiz kimi, Azərbaycan COP29 üçün dünyaya atəşkəs çağırışı edəcək.

Bəs görəsən dünyada müharibə vəziyyətində olan ölkələr – Rusiya-Ukrayna və Fələstin-İsrail bu çağırışa cavab verəcəklərmi ?

Mövzu ilə bağlı Sonxeber.az -a açıqlama verən hərbi ekspert Səxavət Məmməd bildirib ki, müharibə vəziyyətində olan ölkələrin Azərbaycanın atəşkəs çağırışına cavab verməsi gözlənilən hal deyil:

"Azərbaycanın bu addımı atması təqdirəlaiqdir. Çünki Azərbaycan özü də müharibədən çıxıb və sülh müqaviləsi istəyir. Azərbaycan bunu həm ev sahibi kimi, həm də özünün də bu məsələ ilə bağlı problemi olan bir ölkə kimi edəcək. Amma istər Rusiya-Ukrayna müharibəsi, istər Fələstin-İsrail müharibəsi düşünmürəm ki, Azərbaycanın çağırışı ilə dayansın. Təbii ki, Azərbaycan tərəfi öz çağırışlarını edəcək, amma onların bu çağırışa cavab vermələri gözlənilən deyil.

Fələstin-İsrail müharibəsi ilə bağlı çox sayda ölkələr atəşkəs çağırışları edib, amma bu çağırışların heç birinə cavab verilməyib. BMT -nin qoyduğu heç bir tələb yerinə yetirilməyib, etdiyi çağırışlara məhəl qoyulmayıb.

Rusiya-Ukrayna məsələsinə gəldikdə isə, bir müddət öncə atəşkəsin əldə olunması ilə bağlı danışıqlar gedirdi, amma Ukrayna tərəfinin Rusiya ərazisinə daxil olması ilə Rusiya bəyənnat verdi ki, Ukrayna ilə heç vaxt danışıq olmayacaq.

Yəni görünən odur ki, Azərbaycan öz üzərinə düşən öhdəliyi yerinə yetirəcək. Amma buna müsbət cavabların veriləcəyini gözləmək doğru deyil".

Telegramda izləyin