Maraqlı OLAY: Oğurluq üçün girdiyi evdə kitab oxumağa başı qarışdı, ev sahibi tərəfindən TUTULDU

Romanın Prati rayonunda bu yaxınlarda baş verən oğurluq hadisəsi gözlənilməz şəkildə nəticələnib.

Sonxeber.az xarici mənbəyə istinadən xəbər verir ki, 38 yaşlı kişi oğurluq zamanı yunan mifologiyasından bəhs edən kitaba maraq göstərib. Kitabdan ayrılan bilməyən kişi cinayət başında saxlanılıb.

Oğru gecə saatlarında mənzilin eyvanına çıxaraq içəri daxil olub. Ancaq evdə tapdığı kitab diqqətini çəkəndə o, oğurluğu unudub kitabı oxumağa başlayıb. Başı kitaba o qədər qarışmışdı ki, 71 yaşlı ev sahibi onu görəndə belə hələ də oxumağa davam edirdi.

Ev sahibi yuxudan oyananda vahiməyə düşən quldur eyvandan qaçmaq istəsə də, qonşular onun qarşısını alıb və qısa müddət sonra polislər tərəfindən saxlanılıb. Elə həmin gecə başqa evdən oğurladığı düşünülən oğrunun üzərindən son model paltarlar tapılıb.

Bu hadisə sosial şəbəkədə böyük marağa səbəb olub. Bir çox insan hadisəni zarafatla şərh edib.

Telegramda izləyin