Maşında arvadını öldürən şəxs polisə təslim oldu

Konyada arvadını avtomobildə bıçaqlayaraq öldürən şəxs eyni avtomobillə polis bölməsinə gedərək təslim olub. Hadisə zamanı dünyasını dəyişən qadının meyiti araşdırılma üçün tibbi ekspertizaya aparılıb.

Sonxeber.az türk mediasına istinadən xəbər verir ki, hadisə axşam saatlarında mərkəz Səlcuqlu mahalının Hüseyn Çələbi rayonunda baş verib. İddiaya görə, Bəkir Durmaz həyat yoldaşı Elif Durmazla 42 ADD 102 nömrəli avtomobildə mübahisə edib.

Mübahisə zamanı sürücü Bəkir Durmaz yanında olan bıçaqla Elif Durmazın bədəninin müxtəlif nahiyələrindən bıçaqlayıb. Sürücü daha sonra avtomobilində bıçaqlanmış vəziyyətdə olan həyat yoldaşı ilə birlikdə Özalkent Polis İdarəsinə gedib və təslim olub. Polisə həyat yoldaşını bıçaqladığını deyən Bəkir Durmazı nəzarətə götürülüb.

Hadisə yerinə sövq edilən təcili tibbi yardım əməkdaşlarının ilk müayinəsi zamanı Elif Durmazın öldüyü müəyyən edilib. Polisin araşdırmasından sonra hadisədə həyatını itirən Elif Durmazın cansız bədəni araşdırılma üçün tibbi ekspertizaya aparılıb.

Hadisə ilə bağlı araşdırmalara başlanılıb.

Telegramda izləyin