Vətəndaşlar Kəlbəcər və Xankəndiyə nə vaxt KÖÇÜRÜLƏCƏK? - ŞƏRH

İşğaldan azad olunmuş ərazilərə "Böyük Qayıdışa dair Birinci Dövlət Proqramı" çərçivəsində vətəndaşların köçürülməsi prosesi davam edir. Laçın, Füzuli və Zəngilan ilə yanaşı, Şuşa və Xocalıya keçmiş məcburi köçkünlər yerləşdirilir. Vətəndaşları işlə təmin etmək məqsədilə fabrik və zavodların inşasına başlanıb. Eyni zamanda, növbəti ay Cəbrayıl şəhərinə köç həyata keçiriləcək. Proqram çərçivəsində Cəbrayıl, Qubadlı və Zəngilan rayonlarına üç şəhər mərkəzi, beş qəsəbə, 24 kəndin inşası və oraya əhalinin köçürülməsi nəzərdə tutulub.

Lakin Xankəndi və Kəlbəcərə vətəndaşların köçürülməsi tarixi hələ də sual altındadır. Xankəndi yenidən qurulur, binalar əvvəlki görkəminə qaytarılır. Vətəndaşların köçürülməsi üçün lazımi şərait yaradılıb. Bəs COP29-a qədər keçmiş məcburi köçkünlər Xankəndi və Kəlbəcərə yerləşdirilə bilər?

Mövzunu Sonxeber.az-a şərh edən politoloq Məhəmməd Əsədullazadə deyib ki, Kəlbəcər və Xankəndi ərazilərinə Böyük qayıdış proqramının tətbiqi edilməsi yaxın perspektivdə mümkündür:

" Kəlbəcərin mərkəzində evlər tikilib. Hətta bəzi tikintilər istifadəyə yararlıdır. Xankəndidə hər hansı bir dağıntı olmayıb. Bütün evlər yaşayış üçün uyğundur. COP29-a qədər və ondan sonrakı müddətdə Xankəndiyə köçün baş verməsini gözləmirəm. Amma Kəlbəcərə vətəndaşların köçürülməsi mümkündür. Çünki Azərbaycan bu istiqamətdə həyata keçirir və silsilə proqramlar qurub. Eyni zamanda yeni iş yerləri açılır və zavod, fabriklər inşa edilir. Əhalinin məşğulluğu təmin edilir. Azərbaycan son 2 ildə uğurlu pilot layihələr həyata keçirdi. Tez bir zamanda işğaldan azad olunmuş ərazilərə köçürülməsi gözlənilmirdi. Artıq Xankəndi və Kəlbəcərə köç prosesi gündəmə gəlib. Azərbaycan dövlətinin bu məsələlərə həssaslıqla yanaşdığını və işğaldan azad olunmuş ərazilərə məskunlaşma siyasətini tez bir zamanda həyata keçirilməsində maraqlı olduğunu göstərir".

Qeyd edək ki, 2022-2026-cı illəri əhatə edən proqramın birinci mərhələsi çərçivəsində 41 mindən çox keçmiş məcburi köçkün könüllülük prinsiplərinə əməl olunmaqla öz dədə-baba yurdlarına köçəcək.

Sevda Səfərova

Telegramda izləyin