İmtahandan kəsilən tələbə bıçaqla 8 nəfəri öldürüb - VİDEO

Çində peşə məktəbində imtahandan kəsilən şagird bıçaqla hücumu nəticəsində 8 nəfər ölüb, 17 nəfər yaralanıb.

Sonxeber.az xarici mediaya istinadən xəbər verir ki, Vuxi İncəsənət və Texnologiya Peşə Məktəbində yerli vaxtla saat 18:30-da baş verən hücumun şübhəlisi, Xu soyadlı 21 yaşlı tələbə hadisə yerində yaxalanıb. Yixing polisinin verdiyi açıqlamada, Xu-nun imtahanlardan kəsildiyi üçün məzun ola bilmədiyi və təcrübə keçdiyi yerdəki maaşdan razı olmadığı bildirilib.

Qərb sosial media platformalarında yaralıların küçədə uzandığını və insanların köməyə tələsdiyini əks etdirən görüntülər paylaşılıb. Bununla belə, Çinin Veibo kimi sosial media platformalarında yalnız polisin açıqlamasını görmək olur, hadisə ilə bağlı görüntülər və fotoşəkillər senzuradan keçirilir.

Bu, bir həftə ərzində ikinci ölümcül hücum idi. Bundan əvvəl ölkənin cənubundakı Çjuhay şəhərində bir şəxs öz avtomobili ilə idman qurğusunda izdihamın üzərinə sürmüş, nəticədə 35 nəfər həlak olmuş, 43 nəfər yaralanmışdır. Oktyabr ayında Pekində məktəbə hücum olub və 5 uşaq bıçaqla yaralanıb.

Vüsalə İbrahimli

Telegramda izləyin