Şantajın qanunla cəzası nədir? - AÇIQLAMA

Bu gün ölkədə şantaj edildiyi üçün həyatı alt-üst olan çox sayda insan var. Gözləmədiyin bir anda səni təhdid edərək "nəsə" tələb edən biri, gizli bir sirri sənə qarşı vasitə kimi istifadə edir.

Bəs görəsən qanunla şantajın cəzası nədir?

Mövzu ilə bağlı vəkil Rəşad Əliyev Sonxeber.az – a açıqlama verib:

"Hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsi ilə özgənin əmlakını tələb etmə Cinayət Məcəlləsinin 182-ci maddəsi ilə məsuliyyət yaradır.
Bu əmələ görtə 3 ildən 5 ilədək müddətə azadlıqdan məhrum etmə ilə cəzalandırılır. Eyni əməllər qabaqcadan əlbir olan bir qrup şəxs tərəfindən törədildikdə, təkrar törədildikdə, zor tətbiq etmə ilə törədildikdə, xeyli miqdarda (beş min manatdan yuxarı, lakin əlli min manatdan artıq olmayan məbləğ) əmlak əldə etmək məqsədi ilə törədildikdə isə beş ildən on ilədək müddətə azadlıqdan məhrum etmə ilə cəzası nəzərdə tutulub.
Hədə-qorxu ilə tələb etmə mütəşəkkil dəstə tərəfindən törədildikdə, külli miqdarda (dedikdə əlli min manatdan yuxarı, lakin beş yüz min manatdan artıq olmayan məbləğ) əmlak əldə etmək məqsədi ilə törədildikdə, zərərçəkmiş şəxsin sağlamlığına ağır zərər vurmaqla törədildikdə isə on ildən on beş ilədək müddətə azadlıqdan məhrum etmə ilə cəzalandırılır.

Həmin əməllər xüsusilə külli miqdarda (beş yüz min manatdan yuxarı olan mәblәğ) əmlak əldə etmək məqsədi ilə törədildikdə isə on üç ildən on yeddi ilədək müddətə azadlıqdan məhrum etmə ilə cəzalandırılır".

Çiçək Sadatova

Telegramda izləyin