Əməliyyat otağında doğum gününü qeyd edən həkimin həyat yoldaşı da işdən çıxıb

İş yoldaşları ilə birlikdə əməliyyat zamanı doğum gününü qeyd etdiyinə görə işinə xitam verilən "German Hospital"ın cərrah mama-ginekoloqu Ləman Əliyevanın həyat yoldaşı, sözügedən klinikanın Ginekologiya və doğum şöbəsinin müdiri Əziz Rəfibəyov da işdən çıxıb.

Sonxeber.az Oxu.Az-a istinadən xəbər verir ki, o, Sumqayıtdakı Real Tibb Mərkəzində Ginekologiya və doğum şöbəsinin müdiri kimi fəaliyyətə başlayıb.

Qeyd edək ki, Ə.Rəfibəyov 1972-ci il martın 13-də Qırğızıstanın Bişkek şəhərində anadan olub. 1989-cu ildə Qırğızıstan Dövlət Tibb Akademiyasına daxil olub. 1997-ci ildə ali məktəbi bitirib, iki il ərzində mamalıq və ginekologiya üzrə kliniki ordinatura keçib.

1999-cu ildə Azərbaycana gələrək, Sumqayıt şəhəri 2 saylı doğum evində mama-ginekoloq vəzifəsində çalışıb. 2000-ci ildə Qırğızıstan Dövlət Tibb Akademiyasının aspiranturasına daxil olub və 2003-cü ildə bitirib. "Xoşxassəli şişlərin yaranması və qadın reproduktiv sistemində hiperplastik proseslerə qalxanabənzər vəzin hipofunksiyasının təsiri" mövzusunda dissertasiya müdafiə edib və "tibb elmləri namizədi" adına layiq görülüb.

Bir müddət Bişkek şəhərində Respublika Doğum Evində mama-ginekoloq vəzifəsində çalışıb. 2014-cü ildə Bakıda sertifikasiya komissiyasından keçib.

Son illərdə Sumqayıt şəhərində "Real" Tibb Mərkəzində və Bakıda "Caspian International Hospital"da mama-ginekoloq vəzifəsində çalışıb. 2017-ci ildə Rusiyanın Kazan şəhərində ginekologiyada endoskopik cərrahiyyə kursu və Moskvada mamalıqda təxirəsalınmaz hallar mövzusunda kurs keçib. 20-yə yaxın elmi məqalənin müəllifidir.

Telegramda izləyin