Evliliyin ömrünü uzatmaq üçün hansı addımlar atılmalıdır? - AÇIQLAMA

"Bu gün, təkcə, Azərbaycanda deyil, qlobal miqyasda boşanma problemi müzakirə mövzusudur. Çünki, boşanmaların satatistikasında Azərbaycan cəmiyyətində də heç vaxt olmadığı qədər bir dinamika müşahidə olunur. Yəni, bu artıq hər kəsi düşündürəcək bir haldır. Onu da qeyd edim ki, bununla bağlı səbəblər də çoxdur".

Bunu Sonxeber.az-a sosioloq Üzeyir Şəfiyev danışıb.

O, açıqlamasında qeyd edib ki, evlilikləri uzun müddət davam edən cütlüklərə pul və mükafatların verilməsi heç də uğurlu bir addım deyil:

"O ki, qaldı Rusiyada evliliyi uzun müddət davam edən cütlüklərlə bağlı təklif olunan mükafatlara, mən belə düşünürəm ki, Rusiya ona görə belə bir tədbirə əl atıb ki, orada təbii artım sürətli bir şəkildə enəmə dinamikası ilə müşahidə olunur. Həm müharibədə çox ciddi itkilər var, həm də əhalinin qocalması sürətli şəkildə gedir, çünki, yeni doğulanların sayı azalır və ahılların sayı çoxalır. Bu isə dövlət üçün də əlavə maliyyə yükü deməkdir. Rusiya kimi hər an müharibə vəziyyətində olan ölkələr üçün, əlbəttə ki, bu məsələ çox prioritet olduğuna görə belə motivasiyaedici tədbirlərə əl atırlar. Amma, düşünürəm ki, evlilikləri uzun müddət davam edən cütlüklərə pul və mükafatların verilməsi heç də uğurlu bir addım deyil. Çünki, bu əlavə fəsadlara da şərait yaradır. Belə ki, cütlüklər formal olaraq ailəli olduqlarını göstərib sözügedən mükafatı əldə edə bilərlər. O səbəbdən də Rusiyada təklif olunan bu variant heç də, hər zaman uğurlu deyil. O ki, qaldı ailənin davamlılığı üçün addımların atılmağına, münaqişəli ailələr müvafiq qurumlar tərəfindən qeydə alınsın və onlarla sosial-psixoloji iş aparılsın. Eyni zamanda Azərbaycanda ailə dəyərlərini qorumaq lazımdır, Azərbaycan cəmiyyətinin ağsaqqal, ağbirçək arxetiplərini, ailə ilə bağlı olan ənənələri qorumaq lazımdır. Yaxşı olar ki, ailə problemlərinə televiziya verlişləri yox, bu müvafiq qurumlar məşğul olsun. Ölkəmiz azsaylı ölkələrdəndir ki, burada "Ailə, Qadın, Uşaq problemləri üzrə Dövlət Komitəsi" fəaliyyət göstərir. Belə problemlərlə bağlı yerli icra məmurları ilə bərabər onlar işləməlidirlər. Eyni zamanda bölgələrdə də "Ailə, Qadın, Uşaq problemləri üzrə Dövlət Komitəsi"nin şatat vahidləri artırılmaldır. Bu addımlar həm boşanmaların sayının, həm də ki, məişət zorakılığı ilə bağlı keyslərin xeyli sayda azaldırılmasına gətirib çıxarda bilər. Gənc ailələrə mənzil şəraitlərini yaxşılaşdırmaq üçün dəstək proqramları hazırlanmalıdır. Eyni zamanda, ümumiyyətlə, ailənin cəmiyyətdə hörmətini qaldırmaq lazımdır".

Vüsalə İbrahimli

Telegramda izləyin