Oruc tutan zaman susuzluğu necə dəf edək? - TÖVSİYƏLƏR

İnsan orqanizmi üçün su olduqca önəmlidir. Maddələr mübadiləsinin düzgün işləməsi və orqanizmin ümumi fəaliyyəti üçün suyun əhəmiyyəti danılmazdır.

Oxu.Az xatırladır ki, Ramazan ayında oruc tutanlar üçün sudan düzgün istifadə həm sağlamlığı qorumaq, həm də oruc müddətində susuzluğun qarşısını almaq baxımından xüsusilə vacibdir.

Su istehlakı ilə yanaşı, qidaların seçimi də oruc müddətini rahat keçirmək üçün böyük əhəmiyyət daşıyır. Bütün bunları nəzərə alaraq, Ramazan ayı boyunca sağlamlığı qorumaq və orucu rahat keçirmək mümkündür.

Mütəxəssislər bildirirlər ki, oruc tutan zaman orqanizmin suya olan ehtiyacı daha da artır. Bu səbəbdən, iftardan başlayaraq imsak bitənə qədər ən azı 2.5 litr su içmək məsləhət görülür. Bu, oruc tutarkən yaranan susuzluğu azaltmağa və orqanizmi lazımi qədər maye ilə təmin edə bilər.

Mütəxəssislər onu da qeyd edirlər ki, yaşlı insanlar, xüsusən də böyrək, ürək və təzyiq problemləri yaşayanlar üçün maye istehlakı daha vacib olduğu üçün onların suya olan tələbatı həkim nəzarətində hesablanmalı və xüsusi ehtiyaclarına uyğun şəkildə qəbul olunmalıdır.

Hər kəsin bədən quruluşu və sağlamlıq vəziyyəti fərqli olduğu üçün fərdi yanaşma çox önəmlidir.

İsti, soyuq, yoxsa ilıq su?

Oruc açarkən suyun yalnız miqdarı deyil, həm də temperaturu çox önəmlidir. Soyuq su mədədə sıxılmalara və həzm çətinliklərinə səbəb ola bilər. Bu səbəbdən də suyun otaq temperaturunda olması tövsiyə edilir. Bu, həm də mədənin rahatlanmasına və oruc tutarkən hiss olunan narahatlıqların azalmasına kömək edir.

Oruc tutanların iftar və imsakda suya olan ehtiyacını daha da artıran duzlu və ədviyyatlı qidalardan qaçınmaları vacibdir. Bu cür qidalar susuzluğu artırır və oruc tutmaq çətinləşir.

Diyetoloqlar iftar və imsak arasında içəcəyiniz suya təzə limon dilimləri, nanə yarpaqları və ya darçın əlavə etməyi tövsiyə edirlər. Bu əlavələr mədəni rahatlaşdırır, şirniyyat istəyini azaldır və ümumilikdə oruc tutmağı asanlaşdırır.

Oruc tutan zaman susuzluq hissi yaşamamaq üçün su miqdarı yüksək olan tərəvəz və meyvələrdən də faydalanmaq olar. Məsələn, iftar süfrəsində tərəvəz salat və yeməklərinin çox olması bədənin su ehtiyacını qarşılayır və oruc zamanı susuzluğu azaldır.

Oruc tutan zaman çay və qəhvəni iftardan bir-iki saat sonra qəbul etmək tövsiyə olunur.

Telegramda izləyin