Alimlər ən acı maddəni tapdılar

Almaniyanın Leybniz Qida Sistemləri Biologiyası İnstitutunun alimləri "Amaropostia stiptica" adlı rəf göbələkindən üç kimyəvi birləşmə təcrid ediblər.

Sonxeber.az xarici mediyaya istinadən xəbər verir ki, bu maddələrin insan dilindəki acı dad reseptorlarına təsiri öyrənilib. Qeyd olunub ki, üç birləşmədən biri olan oliqoporin D az miqdarda olsa belə, acı dad verə bilir.

Tədqiqata görə, birləşmələr zəhərli olmasa da, son dərəcə acıdır. Alimlər belə təbii acı birləşmələrin təkcə ağızda deyil, mədə, bağırsaq, ürək və ağciyərlərdə olan acı reseptorlara da təsir edə biləcəyini bildiriblər.

Bununla belə, qeyd edilib ki, bu sensorların bədənin digər hissələrindəki rolu tam olaraq bilinmir.

Tədqiqatın müəllifi Dr.Maik Behrens bildirib ki, bu cür araşdırmalar sayəsində acı dad reseptorlarının necə işlədiyi və onların nə üçün təkamül etdikləri barədə daha aydın məlumat əldə etmək olar.

Dr.Maik Behrens, "Acı birləşmələr və reseptorlar haqqında nə qədər çox məlumat toplasaq, yeni maddələri müəyyən etmək və onların təsirlərini proqnozlaşdırmaq bir o qədər asan olar", - dedi.

Telegramda izləyin