İcazəsiz qazıntıda 2 min illik mozaik tapdılar, italyanlara satmağa çalışarkən həbs edildilər - VİDEO

Tokat İl Jandarma Komandanlığı əməkdaşları, Zilə rayon mərkəzində yerləşən bir bağ evinin həyətində qanunsuz qazıntı aparıldığına dair məlumat əsasında dünən əməliyyat həyata keçirib. Əməliyyat zamanı F.Ş. (47), M.Ş. (45) və Ş.Ş. (49) adlı şübhəlilərin bağ evində qazıntı apardığı müəyyən olunub.

Sonxeber.az türk mediasına istinadən xəbər verir ki, qazıntı sahəsində 3 metrə 3 metr ölçülərində, üzərində antik yunan dilində yazı və bir qadın fiquru olan təxminən 2 min illik mozaik aşkar edilib. Şübhəlilərin qazıntı aparılan ərazini torbalarla örtərək gizlətməyə çalışdığı müəyyən olunub.

Hadisə ilə bağlı növbətçi Respublika prokurorunun göstərişi ilə "Mədəniyyət və Təbii İrsin Qorunması Haqqında Qanun" çərçivəsində hüquqi prosedur başlanılıb. F.Ş., M.Ş. və Ş.Ş. hadisə yerində, onlarla əlaqəli olan A.Ş. isə yaşadığı ünvanda saxlanılıb. Saxlanılan şübhəlilərdən F.Ş. və A.Ş. dünən axşam çıxarıldıqları məhkəmə tərəfindən həbs edilərək Zilə M Tipi Qapalı Həbsxanasına göndərilib. M.Ş. və Ş.Ş. isə məhkəmə nəzarəti şərti ilə sərbəst buraxılıb.

Əldə olunan tarixi əsərin mütəxəssislər tərəfindən ətraflı şəkildə araşdırılacağı bildirilib. Bundan əlavə, qazıntını icazəsiz həyata keçirən şəxslərin mozaikin tapıldığı bağ evini İtaliyada əlaqə saxladıqları bir şəxsə satmağa çalışdıqları da iddia olunur. Hadisə ilə bağlı istintaq davam edir.

Telegramda izləyin