Bu həkimlər cəzalandırılacaq - AÇIQLAMA

Son günlər saxta diplomlu həkimlər yenidən gündəmdə qalmağa davam edir. Belə ki, bu mövzu sosial şəbəkədə ən çox müzakirə olunan məsələlərdən biridir.

Bəs görəsən qanunla bu həkimləri hansı cəzalar gözləyir?

Vəkil Turan Abdullayev bu barədə Sonxeber.az -a açıqlama verib:

"Saxta diplomlu və saxta sertifikatlar əsasında fəaliyyət göstərən həkimlər dərhal göstərdiyi xidmətdən kənarlaşdırılmalı, qanunvericiliyə müvafiq şəkildə cəzalandırılmalıdır. Saxta sənədlər əsasında fəaliyyət göstərən kosmetoloqları, həkimləri, tibb işçilərini müəyyən etmək üçün Azərbaycan Respublikası Səhiyyə Nazirliyinin üzərinə əhəmiyyətli yük düşür. Hətta tibb müəssisələrində qanuni yoxlamalar aparmaq üçün Səhiyyə Nazirliyinin Analitik Ekspertiza Mərkəzi də var.

Azərbaycan Respublikası İnzibati Xətalar Məcəlləsinin 215.4-cü maddəsinə əsasən, qanunvericiliyə uyğun olaraq sertifikasiyadan keçməyən şəxslərin (işçilərin) praktik tibb və əczaçılıq fəaliyyətinə buraxılmasına görə — vəzifəli şəxslər səkkiz yüz manatdan min manatadək məbləğdə, hüquqi şəxslər altı min manatdan səkkiz min manatadək məbləğdə cərimə edilir.
Yəni sertifikikasiyadan keçməmiş həkimləri tibb fəaliyyətinə buraxdığına görə vəzifəli şəxslər 1000 manatadək, tibb müəssisələri isə 8000 manatadək cərimələnə bilər".

Telegramda izləyin