"Qohum nikahları qadağan edildikdən sonra evlənmək istəyənlər başqa ölkələrə gedəcəklər" - AÇIQLAMA

Evlənənlərin sayında ötən illə müqayisədə artım müşahidə edilir. Dövlət Statistika Komitəsinin məlumatına görə, ötən ilin yanvar-fevral aylarında 6 739 nikah qeydə alınmışdısa, bu ilin eyni dövründə 7741 nikah və 3414 boşanma qeydə alınıb.

Sosioloq Lalə Mehralı məsələ ilə bağlı Sonxeber.az -a açıqlama verib.

"Bu, müəyyən dərəcədə evliliklərin sayının artmasına təsir göstərə bilər. Lakin, araşdırmaq lazımdır. Qurulan ailələrin neçə faizi qohum nikahlarının payına düşür. Bu, konkret araşdırıldıqdan sonra deyilə bilər ki, məsələyə qohum nikahlarının qadağası nə qədər təsir edib. Amma ümumilikdə nəzər yetirsək, bəli, insanlar hesab edir ki, qohum nikahları qadağan edilməzdən əvvəl qohumları ilə evlənsələr irəli düşmüş sayılırlar. Lakin, özlərinə, gələcəklərinə necə böyük bir bədbəxtlik gətirdiklərinin fərqində deyillər. Qadağa ona görə tətbiq edilir ki, bu, gələcək nəsillərin sağlamlığını qarantiyə alır. Əgər insanlar qohum nikahlarının niyə qadağan edildiyinin fərqində deyillərsə, qaydaların onlar üçün əhəmiyyəti olmayacaq. Çünki, onlar elə hesab edirlər ki, qadağalar pozmaq üçündür. Hesab edirəm ki, qohum nikahları qadağan edildikdən sonra evlənmək istəyənlər başqa ölkələrə gedəcəklər. Bir yol tapacaqlar. İnsanlar birşeyi anlamır ki, bu evliliklər onların öz gələcəklərinə etdikləri ən böyük pislikdir".

Qeyd edək ki, Azərbaycanda əmi, xala, bibi və dayı uşaqlarının evliliyinə qoyulan qadağa təsdiqlənib. Qadağa iyulun 1-dən qüvvəyə minəcək.

Telegramda izləyin