Sürücüsüz taksi xidməti bu ölkəyə də gəlir

Çinin texnologiya nəhəngi Baidu, sürücüsüz nəqliyyat xidməti olan Apollo Gonu Avropa və Türkiyə bazarlarına çıxarmağa hazırlaşır.

Sonxeber.az türk mediasına istinadən xəbər verir ki, şirkət ilk addımı İsveçrədə atmağı planlaşdırır, bununla yanaşı Türkiyədə də fəaliyyətə başlamağı hədəfləyir.

Hazırda Çinin bir çox şəhərində, xüsusilə Wuhan şəhərində geniş şəkildə fəaliyyət göstərən Apollo Go xidməti, beynəlxalq miqyasda genişlənmə strategiyası çərçivəsində İsveçrədə yerli ofis açmaq niyyətindədir. Bildirilir ki, şirkət bu məqsədlə İsveçrənin milli poçt xidmət təminatçısı olan PostAuto ilə danışıqlar aparır. Lakin Swiss Post, hələlik Baidu və ya hər hansı başqa texnologiya şirkəti ilə rəsmi əməkdaşlığın olmadığını açıqlayıb.

Baidu-nun Türkiyə planları da gündəmdədir. Şirkət burada "aktivləri az olan" (asset-light) modelə əsaslanaraq, yerli tərəfdaşlarla əməkdaşlıq və texnologiya transferi yolu ilə Apollo Go xidmətini təqdim etməyi planlaşdırır. Bu model sayəsində Baidu, beynəlxalq bazarlarda daha sürətli və səmərəli genişlənməyi hədəfləyir.

Qeyd edək ki, Apollo Go hazırda Çində 10-dan çox şəhərdə fəaliyyət göstərir və Wuhan şəhərində 400-dən çox otonom nəqliyyat vasitəsilə ən böyük filoya malikdir. Şirkət, 2025-ci ili beynəlxalq genişlənmə baxımından strateji il kimi qiymətləndirir və Avropa ilə Yaxın Şərqdə yeni bazarlara daxil olmaq istəyir.

Telegramda izləyin