Hava limanında polis və sərnişinlərə hücum edən şəxs güllələnərək öldürüldü - VİDEO

İspaniyanın Gran Kanariya Hava Limanında baş verən dəhşətli anlar təhlükəsizlik kameralarına düşüb. İngilis turistlərin sıx istifadə etdiyi bu hava limanında 18 yaşlı bir gənc polislərə və sərnişinlərə bıçaqla hücum etdikdən sonra güllələnərək zərərsizləşdirilib.

Sonxeber.az xarici mediaya istinadən xəbər verir ki, hadisə şənbə günü günorta saatlarında baş verib. Məlumata görə, Qambiyaya getmək istəyən gənc biletinin 22 may tarixli olduğu üçün uçağa buraxılmayıb. Bu vəziyyətə etiraz edən gənc, zorla təhlükəsizlik nəzarətindən keçməyə cəhd edib. Onun bel çantasında gizlətdiyi bıçaq metal detektorunu işə salıb.

Təhlükəsizlik kamerası görüntülərində gəncin əvvəlcə bir taksi sürücüsünə hücum etdiyi, daha sonra onu dayandırmağa çalışan polis əməkdaşlarından birini yerə yıxdığı görünür. İnsanlarla dolu ərazidə əlində bıçaqla təhlükə saçan şəxs sərnişinlərə tərəf qaçarkən polisin xəbərdarlıqlarına məhəl qoymayıb.

İspaniya Milli Polisinin əməkdaşları əvvəlcə ona sözlü xəbərdarlıq edib. Lakin o, hücumlarını davam etdirdiyi üçün polis atəş açmaq məcburiyyətində qalıb. Gənc beş güllə ilə vurulub, boynuna dəyən güllə nəticəsində hadisə yerində həyatını itirib.

Polis həmkarlar ittifaqının sözçüsü İbon Dominqes hadisə ilə bağlı danışıb: "Müdaxilə zəruri və proporsional idi. Bu şəxs asanlıqla polis əməkdaşlarından birini öldürə bilərdi," – deyə bildirib.

Telegramda izləyin