Alkoqollu gənc şəhəri bir-birinə qatdı: Rəhbərini döyüb pulunu və avtomobilini ələ keçirdi - VİDEO

Türkiyənin Kırıkkale şəhərində bir gəncin törətdiyi hadisələr şəhərdə böyük həyəcan yaradıb. Hadisə dünən axşam saatlarında Gürler məhəlləsində baş verib.

Sonxeber.az türk mediasına istinadən xəbər verir ki, əldə edilən məlumata görə, qadın salonu işlədən Y.T. (37), yeni işə götürdüyü M.Y. (21) ilə kafedə vaxt keçirdikdən sonra geri dönərkən avtomobildə mübahisə baş verib. Alkoqollu olduğu müəyyən edilən M.Y., rəhbəri Y.T.-ni döyərək cibindəki 19 min lirəni (təxminən 1.045 AZN) əlindən alıb. Daha sonra isə ona məxsus, üzərində saxta dövlət nömrə nişanı olan Peugeot markalı avtomobili qaçıraraq hadisə yerindən uzaqlaşıb.

M.Y. Alparslan Türkeş Bulvarına çıxaraq, Dispanser döngəsində 71 S 0039 dövlət nömrə nişanlı məktəb servisinə çırpılıb. Nəticədə B.C.A., B.C., R.Z. və H.U. adlı şəxslər xəsarət alıb. Hadisə zamanı servis sürücüsü N.K. (60) avtomobildən endikdən sonra ikinci dəfə qəsb hadisəsi baş verib – M.Y. bu dəfə servis mikroavtobusunu qaçıraraq hadisə yerindən bir daha uzaqlaşıb.

Təxminən 4 kilometrlik təqibdən sonra M.Y. Otogar körpüsündə sükan arxasında nəzarəti itirərək qəza törədib və avtomobil aşıb. O, avtomobildən düşərək piyada qaçmağa çalışsa da, Asayiş Şöbəsinin əməkdaşları tərəfindən qısa müddətdə saxlanılıb. Xəstəxanada aparılan yoxlama zamanı onun 1.30 promil alkoqollu olduğu müəyyən edilib.

Hadisə nəticəsində xəsarət alan 4 nəfər və qadın salonunun sahibi Y.T. xəstəxanada müalicə altına alınıb. Yaralıların vəziyyətlərinin stabil olduğu bildirilir. Eyni zamanda, park halında olan 7 avtomobilə ciddi maddi ziyan dəyib. Faktla bağlı araşdırma aparılır.

Telegramda izləyin