Elm dünyasında bir ilk: Yer qabığının çatlaması görüntüləndi - VİDEO

Zəlzələ tədqiqatları tarixində ilk dəfə olaraq, bir fay xəttinin yer üzünü necə yardığı an dəqiq şəkildə kameraya düşüb. Hadisə bu ilin 28 martında Myanmarda baş verən 7,7 bal gücündəki zəlzələ zamanı qeydə alınıb.

Sonxeber.az xarici mediaya istinadən xəbər verir ki, Mandalay şəhərinin cənubunda yerləşən günəş enerjisi stansiyasının müşahidə kamerası tərəfindən lentə alınan 15 saniyəlik görüntüdə əvvəlcə yerin titrədiyi, daha sonra isə fay xəttinin sürüşərək təxminən 6 metrə qədər yer dəyişdiyi aydın şəkildə görünür.

ABŞ-lı seysmoloq Vendi Bohon görüntüləri "nəzəriyyənin reallığa çevrildiyi an" kimi dəyərləndirib. Cənubi Kaliforniya Universitetindən professor Con Vidale isə bu səviyyədə aydınlıqda yerin yarılması anının daha əvvəl heç vaxt çəkilmədiyini bildirib.

Zəlzələ zamanı 5.300-dən çox insan həyatını itirib. Bu, Myanmarın müasir tarixində ən ölümcül ikinci zəlzələ olaraq qeydə alınıb.

Alimlər görüntülərin geologiya elminə mühüm töhfə verəcəyini, dərs kitablarında istifadə ediləcəyini və yeni nəsil tədqiqatçılar üçün ilham mənbəyi olacağını bildiriblər. Sosial şəbəkələrdə paylaşılan video minlərlə bəyənmə toplayaraq geniş rezonans doğurub.

Telegramda izləyin