Sumqayıtda zavodda baş verən partlayışla bağlı RƏSMİ MƏLUMAT

"20 may saat 12 radələrində "Azərikimya" İstehsalat Birliyinin Etilen-polietilen zavodunda istehsalatın sintez sahəsində, B texnoloji xəttində aşağı təzyiq ayırıcısında reqlamentə uyğun təmir işi apararkən hadisə baş verib".

Bu barədə "Azərikimya" İB-nin Etilen-polietilen zavodundan Oxu.Az-a verilən məlumatda deyilir.

Qeyd olunur ki, hadisə nəticəsində beş nəfər xəsarət alıb, iki nəfərə ambulator xidmət göstərilərək evə buraxılıb. Xəsarət alan üç şəxs xəstəxanaya yerləşdirilib.

Hadisənin başvermə səbəbi araşdırılır.

14:07

Partlayış "Azərkimya" İstehsalat Birliyinin Etilen-Polietilen zavodunun 11-ci sahəsinin etilen dənəvərləşmə 100/5 qurğusunda baş verib.

Oxu.Az-ın məlumatına görə, həmin qurğunun yerləşdiyi 12 metr hündürlükdə qaynaq işləri aparılan zaman anidən partlayış baş verib.

Partlayış zamanı xəsarət alanlardan üç nəfər zavodun işçisi, iki nəfər isə kənardan dəvət olunmuş şəxsdir.

13:43

Sumqayıtda zavodda baş verən partlayışda xəsarət alanların sayı artıb.

Tibbi Ərazi Bölmələrini İdarəetmə Birliyindən (TƏBİB) Oxu.Az-ın sorğusuna cavab olaraq verilən məlumata görə, partlayış səbəbilə 20.05.2025-ci il tarixində saat 12:20-də beş nəfər (kişi cinsli) Sumqayıt Tibb Mərkəzinin (STM) nəzdində olan Təcili Tibbi Yardım Xəstəxanasına hospitalizasiya olunub.

"Müxtəlif dərəcəli yanıq xəsarətləri alan şəxslərə zəruri tibbi xidmətlər göstərilib. Vəziyyəti ağır qiymətləndirilən üç nəfər Nərimanov Tibb Mərkəzinin nəzdində olan Yanıq Mərkəzinə təxliyə olunur.

Digər iki nəfərin müalicəsi isə müvafiq şöbədə davam etdirilir, vəziyyətləri orta ağırdır", - məlumatda bildirilir.

13:25

Sumqayıtda zavodda baş verən partlayışla bağlı bəzi məqamlar bəlli olub.

Oxu.Az-ın əldə etdiyi məlumata görə, partlayış qaynaq işləri aparılan zaman baş verib.

13:03

Sumqayıt şəhərində yerləşən sənaye müəssisələrindən birində partlayış baş verib.

Sonxeber.az "Report"a istinadən xəbər verir ki, hadisə şəhərin Sahil küçəsində yerləşən zavodlardan birində qeydə alınıb.

Əraziyə dərhal Fövqəladə Hallar Nazirliyinin qüvvələri, Dövlət Yanğından Mühafizə Xidmətinin canlı qüvvə və texnikası cəlb olunub.

İlkin məlumata əsasən, hadisə nəticəsində üç nəfər xəsarət alıb.

Partlayışın səbəbləri araşdırılır, ərazidə təhlükəsizlik tədbirləri görülür.

Telegramda izləyin