"Deyirdi ki, məndən ayrılsan, səni öldürəcəyəm"

Xəbər verdiyimiz kimi, Xalq artisti Naibə Allahverdiyevanın keçmiş həyat yoldaşı Yusif İsmayılov həbs olunub.

Aktrisa məsələ ilə bağlı Real TV-yə müsahibəsində keçmiş həyat yoldaşı tərəfindən ölümlə təhdid olunduğunu açıqlayıb:

"Heç olmasa bir dəfə cəzasını çəkməlidir. O adam həyatımın 8 ilini məhv edib. Məni xəstə etdi. Pullarımı əlimdən tutub alıb. Böyük məbləğlər olmayıb. Bu, dəfələrlə baş verib. Dava edəndən sonra evi axtarırdı. Mən də tək olurdum. Gücüm çatmırdı. Axırıncı dəfə qızılımı götürüb apardı. Həmişə məni təhdid edib. Deyirdi ki, məndən ayrılsan səni öldürəcəyəm. Onun əlindən qaçıb 7-8 ay başqa yerdə yaşadığım da olub. Bir də görürdün yalvarırdı ki, mən düzələcəyəm. Bu haqqda mənim bütün qohumlarım, ətrafım bilir. Dəfələrlə onu bağışlamışam. Düşünürdüm ki, insandır, ailəyik, düzələr".

Göz yaşlarına hakim ola bilməyən N.Allahverdiyeva Y.İsmayılov barəsində uzaqlaşdırma qərarının çıxarılmasını istədiyini vurğulayıb:

"Həbs olunanda bacısı zəng vurdu ki, ərizəni geri götürməlisən. Dedim ki, etməyəcəyəm. Artıq bu adam məni hamının yanında biabır edib, əl qaldırır".

Qeyd edək ki, keçmiş əri Yusif İsmayılov N.Allahverdiyevanın hüquq-mühafizə orqanlarına etdiyi şikayət əsasında saxlanılıb. O, Naibə Allahverdiyevaya qarşı zor tətbiq etməkdə ittiham olunub. Məhkəmənin qərarı ilə Yusif İsmayılov İnzibati Xətalar Məcəlləsinin 157-ci maddəsində nəzərdə tutulan inzibati xətanı törətməkdə təqsirli bilinib və 15 gün müddətə həbs edilib.

Telegramda izləyin