İşdə yediyi yeməkdən sonra 13 orqanı çıxarıldı

İngiltərədə yaşayan 39 yaşlı Rebekka Hindin həyat hekayəsi həm ürək dağlayır, həm də insan iradəsinin gücünü göstərir. Ona nadir rast gəlinən, çox ağır gedişə malik və müalicəsi son dərəcə çətin olan "jele xərçəngi" - elmi adı ilə Pseudomiksoma Peritonei diaqnozu qoyulub.

Milli.Az xəbər verir ki, hər şey 2018-ci ildə Rebekkanın bir iş yeməyindən sonra özünü pis hiss etməsi ilə başlayıb. Əvvəlcə qida zəhərlənməsi kimi qəbul edilən bu vəziyyət, aylarla davam edən ağrılar və narahatlıq nəticəsində daha ciddi diaqnozla əvəzlənib - qarın boşluğunda müsin adlı jelevari maye ilə müşahidə olunan nadir xərçəng növü.

Rebekkanın vəziyyəti elə ağırlaşıb ki, həkimlər bir-birinin ardınca iki böyük əməliyyata qərar veriblər. İlk əməliyyatda ondan kor bağırsaq, göbək, mədə pərdəsi və 6 litr müsin mayesi çıxarılıb. Lakin xərçəng sürətlə yayılmağa davam edib.

İkinci əməliyyat daha da geniş olub - dalaq, öd kisəsi, yoğun bağırsaq, uşaqlıq, yumurtalıqlar və mədənin bir hissəsi daxil olmaqla, ümumilikdə 13 orqan və orqan hissəsi çıxarılıb.

Rebekka kimyaterapiya kursları keçməsinə baxmayaraq, xəstəlik 2022-ci ildə geri qayıdıb. Onun son ümidi yeni bir müalicə proqramı olub, lakin bu da nəticə verməyib. Həkimlər artıq onu "müalicəolunmaz xəstə" kimi qiymətləndirirlər.

Amma Rebekka Hind təslim olmayıb. O, yaşamaq üçün mübarizəsini davam etdirir, fiziki və emosional ağrılarına baxmayaraq, gündəlik həyatına davam etməyə çalışır. Sosial mediada yazdığı paylaşımlar minlərlə insana ilham verir.

"İnsanlara sadəcə demək istəyirəm ki, nə qədər çətin olsa da, yaşamaq üçün səbəblər tapmaq mümkündür. Mən hələ də buradayam, nəfəs alıram və mübarizə aparıram", - deyə Rebekka bildirib.

Qeyd edək ki, Pseudomiksoma Peritonei çox nadir rast gəlinən onkoloji xəstəliklərdən sayılır və dünyada bu diaqnozu alan insanların sayı olduqca azdır.

Telegramda izləyin