1 ay izlədilər, 3 dəqiqədə 3 milyonluq quldurluq etdilər - VİDEO

İstanbulun Başakşehir rayonunda yerləşən bir qızıl dükanında 11 iyun tarixində film səhnələrini xatırladan silahlı soyğun baş verib.

Sonxeber.az xəbər verir ki, əldə olunan məlumata görə, şəxsiyyətləri hələlik müəyyən edilməyən 5 nəfər, təxminən bir ay izlədikləri bu qızıl dükanının jalüz açarını kopyalayaraq detallı soyğun planı hazırlayıblar.

Hadisə günü oğurluq olduğu müəyyən edilən motosiklet və avtomobillə iş yerinə gələn dəstədən biri ətrafı nəzarətdə saxlayarkən, digər 4 nəfər hərəkətə keçib. Jalüzü açan şübhəlilər daha sonra şüşə qapını sındıraraq içəri daxil olublar. Onlar cəmi 3 dəqiqə ərzində dükanın içindəki bütün qızıl-zinət əşyalarını toplayaraq təxminən 3 milyon dəyərində oğurluq edib, hadisə yerindən qaçıblar.

Soyğun zamanı qızıl dükanının mühafizəçisi ilə qarşılaşan şübhəlilərdən biri silah göstərərək "Səni vurarıq, maneə olma!" deyə təhdid edib. Məlumata görə, üzləri maskalı olan dəstə üzvlərinin hamısı silahlı olub.

Polis hadisə ilə bağlı genişmiqyaslı istintaqa başlayıb. Hadisə yerinin təhlükəsizlik kameraları və ətrafdakı Şəhər Təhlükəsizlik İdarəetmə Sistemi (KGYS) görüntüləri incələnir. Şübhəlilərin kimliyinin müəyyənləşdirilməsi və onların saxlanılması istiqamətində araşdırmalar davam etdirilir.

Telegramda izləyin