Bıçaqlı davadan qaçarkən avtobusun altında qaldı - VİDEO

Mardin vilayətinin Midyat rayonunda dəhşətli hadisə baş verib. Mərkəzə bağlı Cümhuriyyət Bulvarında yerləşən bir iş yerinin sahibi ilə orada çalışanlar arasında hələlik naməlum səbəbdən bıçaqlı dava düşüb.

Sonxeber.az türk mediasına istinadən xəbər verir ki, hadisənin ortasında qalan İnfaz Mühafizə Məmuru Faruk Akış davadan qaçmaq istəyərkən tarazlığını itirərək yola yıxılıb. Elə bu anda sürücüsü və dövlət nömrə nişanı hələlik müəyyən olunmayan bir avtobus onun üzərindən keçib.

Hadisə barədə məlumat verildikdən sonra əraziyə təcili tibbi yardım və polis əməkdaşları cəlb olunub. Ağır yaralanan Akışa ilkin tibbi yardım göstərilsə də, o, aparıldığı Midyat Dövlət Xəstəxanasında həkimlərin bütün müdaxilələrinə baxmayaraq həyatını itirib.

Hadisə anı ətrafdakı bir iş yerinin təhlükəsizlik kamerası tərəfindən qeydə alınıb. Faruk Akışın cənazəsi tibbi ekspertizadan sonra dəfn edilib. Avtobus sürücüsü saxlanılıb və hadisə ilə bağlı araşdırma aparılır.

Telegramda izləyin