Deputat: "Ukrayna müharibəsinin sosial gərginlikləri Rusiyada antimiqrant ritorikasını gücləndirir"

"Son dövrlər Rusiyada baş verən hadisələr, xüsusən miqrantlara və qeyri-rus xalqlara qarşı yönələn təzyiqlər, təhqiramiz ritorika və zorakı aksiyalar bir neçə paralel məqsədə xidmət edir".

Bunu Oxu.Az-a açıqlamasında Milli Məclisin deputatı Elçin Mirzəbəyli bildirib.

Deputat deyib ki, Rusiyanın siyasi dairələri iqtisadi çətinliklər, beynəlxalq təcrid, Ukrayna müharibəsinin yaratdığı sosial gərginliklər fonunda yaranan yarıgizli narazılığı ənənəvi qaydada fərqli istiqamətlərə yönləndirməyə çalışır:

"Tarixən də Rusiyada siyasi və iqtisadi böhran dövrlərində daxili düşmən obrazı yaratmaq ənənəsi olub. Antimiqrant ritorikası da bu kontekstdə klassik "günah keçisi" strategiyasıdır".

E.Mirzəbəylinin fikrincə, Rusiya dövlətçiliyinin təməl elementlərindən biri olan "rus xalqının aparıcı rolu" ideologiyası şovinist meyilləri daha da gücləndirib:

"Şovinist mövqelər, "Rusiya ruslar üçündür" tipli çağırışlar multietnik federativ modelin de-fakto tənəzzülə uğradığını göstərir. Bu isə daxildə sərt mərkəzləşməni legitimləşdirməyə xidmət edir. Sosial təbəqələrarası ixtilafların aləti kimi miqrantlar, əsasən, ən azödənişli, ağır işlərdə çalışırlar. Bu səbəbdən yoxsul rus təbəqələri ilə miqrantlar arasında rəqabət və qısqanclıq yaranır. Hakimiyyət bunu bilərəkdən şişirdir, sosial-iqtisadi problemləri əcnəbilərin üzərinə yıxır".

Deputat əlavə edib ki, bu strategiya qısamüddətli siyasi dividendlər qazandırsa da, uzunmüddətli perspektivdə Rusiyanın daxili sabitliyini daha da zəiflədə, etnik və dini zəmində qarşıdurmaları dərinləşdirə bilər:

"Müasir dünyada etnik və dini müxtəlifliyin düşmən obrazına çevrilməsi yalnız cəmiyyətdə parçalanmanı artırır".

E.Mirzəbəyli qeyd edib ki, mövcud vəziyyətdən həm də öz maraqları üçün yararlanan Solovyov, Skabeyeva kimi şəxslər öz auditoriyasına "daxili düşmən və xarici təhlükə" konsepsiyası satmaqda davam edirlər:

"Azərbaycanlı miqrantları, ümumən türkdilli xalqları təhlükə kimi təqdim etmək asan üsuldur, çünki Rusiyada tarixi stereotiplər yetərincə güclüdür. Bu ritorika həm islamofobiya, həm də türkofobiyadan qidalanır. Eyni zamanda Rusiya ultramillətçi əhvali-ruhiyyəni gücləndirərək "bizə tabe olmayan qonşu pis qonşudur" mesajını verir. Solovyov, Skabeyeva kimi təşviqatçılar miqrantlardan düşmən obrazı yaradaraq reytinq və reklam gəliri qazanırlar. Onların efirində Azərbaycan mövzusu həm Ermənistan auditoriyasını, həm Rusiya ultramillətçi kəsimini cəlb edir. Bu baxımdan Azərbaycanı hədəfə almaq həm onların siyasi sifariş, həm də korporativ marağından qaynaqlanır".

Deputat hesab edir ki, bu proseslər təsadüfi deyil:

"Azərbaycanın öz milli maraqları əsasında yürütdüyü müstəqil siyasət və regiondakı güclənən mövqeyi Rusiya mediasını və siyasi çevrələrini narahat edir. Ona görə də ritorika sərtləşir. Lakin bu qısamüddətli təzyiqdir və faktiki reallığı dəyişmir. Əksinə, Azərbaycana qarşı bu cür hücumlar ictimaiyyətimizdə milli həmrəylik və soyuqqanlı diplomatik mövqe ətrafında daha çox birləşmə tendensiyasını gücləndirir".

Xatırladaq ki, iyunun 27-də Rusiyanın Yekaterinburq şəhərində 50 azərbaycanlı təhlükəsizlik qüvvələri tərəfindən saxlanılıb. Hadisə nəticəsində Ziyəddin və Hüseyn Səfərov qardaşları, həmçinin onların əmisi oğulları Kamal Qədiməli oğlu Səfərov, Ayaz Möhbalı oğlu Səfərov və onun qardaşı Məzahir Möhbalı oğlu Səfərov öldürülüblər.

Telegramda izləyin