Vuçiç: "Dövlət etirazçılar üzərində qələbə qazandı"

Serbiya Prezidenti Aleksandar Vuçiç gecə saatlarında baş verən toqquşmalarda dövlətin etirazçılar üzərində qələbə qazandığını elan edib.

Oxu.Az TASS-a istinadla xəbər verir ki, Serbiya lideri bu barədə xalqa müraciəti zamanı Belqradda baş verən iğtişaşları şərh edərkən bildirib.

"Serbiya qalib gəldi, çünki bəzilərinin istədiyi kimi Serbiya zorakılıqla məğlub edilə bilməz. Serbiya dayanmayıb və heç vaxt dayanmayacaq", - deyə Vuçiç qeyd edib.

Prezident, həmçinin bildirib ki, saxlanılanların heç birini əfv etmək niyyətində deyil. Onun sözlərinə görə, iğtişaşların iştirakçıları birbaşa vətəndaş qarşıdurmasına və polisə hücuma çağırış səsləndiriblər.

Serbiya Daxili İşlər Nazirliyinin məlumatına görə, iyunun 28-də keçirilən icazəsiz müxalifət aksiyasında 36 minə yaxın insan iştirak edib. Belqradda iğtişaşlar nəticəsində 48 polis əməkdaşı yaralanıb, 1-i azyaşlı olmaqla 77 nəfər saxlanılıb.

Telegramda izləyin