"Rusiya hüquq-mühafizə orqanlarının Yekaterinburqda azərbaycanlılara qarşı qeyri-insani rəftarı bağışlanılmazdır" - DEPUTAT

"Yekaterinburqda azərbaycanlılara qarşı törədilən vəhşilik yolverilməzdir və tez bir zamanda səbəbkarlar tapılmalı qanun çərçivəsində cəzalandırılmalıdır".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Rusiya hüquq-mühafizə orqanlarının Yekaterinburqda azərbaycanlılara qarşı qeyri-insani rəftarı bağışlanılmaz haldır və hüquq normalarına tamamilə ziddir. Soydaşlarımıza qarşı törədilmiş bu cinayət bir daha Rusiyanın bəzi inzibati orqanlarının müəyyən dairələrin təsiri altına düşməsini sübut edir. Azərbaycan Xarici İşlər Nazirliyi haqlı olaraq Rusiyaya kəskin münasibətini bildirir və soydaşlarımıza qarşı törədilmiş vəhşiliklə bağlı izahat tələb edir. Azərbaycan xalqı bu hadisədən ciddi narahatdır.25 il əvvəl baş vermiş bir cinayət hadisəsi ilə bağlı hər hansı rəsmi sübut təqdim olunmadan azərbaycanlıların qəddarlıqla qətlə yetirilməsi, təhqir olunması və işgəncələrə məruz qalması həm absurddur, həm inandırıcı deyil. Çünki bu, həmyerlilərimizə qarşı ilk belə hal deyil. AZAL-a məxsus sərnişin təyyarəsinin vurulması, kiber hücumlar həmçinin Moskvada və Rusiyanın digər şəhərlərində azərbaycanlılara qarşı qeyri-insani əməllər sübut edir ki, bütün bu proseslər Azərbaycan qarşı başladılan siyasətdir və eyni mərkəzdən idarə olunur".

Deputat vurğulayıb ki, Azərbaycan qonşu ölkələrlə daim dostluq münasibətləri qurmağı çalışır:

"Eləcə də Rusiya ilə. Azərbaycan hər zaman Rusiya ilə münasibətlərin yaxşılaşmasının tərəfdarı olub. Lakin son bir neçə ayda Rusiyanın davranışları iki ölkə arasında münasibətlərə mənfi təsir göstərir. Yekaterinburqda azərbaycanlılara qarşı törədilən zorakılıq ilə bağlı şəffaf araşdırma aparılmalı və tez bir zamanda cinayətkarlar öz cəzalarını almalıdır".

Telegramda izləyin