Yay ayıdır, amma bu ərazidə qış geri döndü: Qızdırıcı sobalar yanır - VİDEO

Türkiyənin cənub-şərq bölgəsində yerləşən əksər şəhərlər iyul ayında yandırıcı isti ilə mübarizə apararkən, Bingöl vilayətinin 1940 metr yüksəklikdə yerləşən Karlıova rayonunda isə qış geri dönüb.

Sonxeber.az xəbər verir ki, havanın temperaturu 15-20 dərəcə arasında dəyişən rayonda həm evlərdə, həm də qəhvaxanalarda sobalar yenidən quraşdırılıb.

Xüsusilə axşam saatlarında qəhvaxanalara gələn vətəndaşların üşüməməsi üçün obyekt sahibləri sobaları yandırmağa başlayıblar.

Rayon sakinlərindən Şerif Yıldız vəziyyətlə bağlı deyib:

"Bir çox şəhərdə insanlar istidən dənizə girir, amma biz hələ də isinməmişik. Sobaların yanında qızınmağa çalışırıq".

Karlıova sakinləri bu qeyri-adi hava şəraitinə artıq alışdıqlarını bildirsələr də, yay fəslində belə soba yandırmaq sosial mediada da təəccüb doğurub.

Telegramda izləyin