Məsciddə video çəkən qadının sözləri müzakirələrə səbəb oldu: "Buralar niyə belədir?"

Türkiyə üzrə ümumilikdə təxminən 90 min məscid fəaliyyət göstərir. Bu məscidlərin əksəriyyətində qadınlar üçün nəzərdə tutulmuş xüsusi ibadət sahələri olsa da, həmin bölmələrin yetərsizliyi uzun müddətdir ki, müzakirə mövzusudur.

Sonxeber.az türk mediasına istinadən xəbər verir ki, adətən məscidin əsas hissəsindən ayrı – balkon, arxa tərəf və ya pərdə ilə ayrılmış sahələrdə yerləşdirilən bu bölmələr qadınların ibadət təcrübəsinə birbaşa təsir edir.

Son günlərdə bu mövzu ətrafında müzakirələri alovlandıran səbəb isə gənc bir qadının ibadət məqsədilə getdiyi məsciddə çəkdiyi və sosial mediada paylaşdığı görüntülər oldu. Qadın və kişilərin namaz qıldığı sahələri müqayisə edən həmin gənc qadın çəkdiyi görüntüləri "Məscidlərdə qadın bölmələri niyə bu haldadır? Bəli, kişilər məscidə daha çox gəlir, amma buradakı şərait də daha yaxşı ola bilərdi" qeydi ilə paylaşıb.

Paylaşım qısa müddətdə minlərlə insana çatdı və sosial mediada geniş rezonans doğurdu. Bəzi istifadəçilər qadınlara ayrılan məscid sahələrinin yaxşılaşdırılmasının vacibliyini vurğuladıqları halda, digərləri mövcud vəziyyətin kifayət etdiyini qeyd etdilər.

Telegramda izləyin