Zooparkda dəhşət: Şirin hücum etdiyi qadın qolundan oldu

Avstraliyanın Kvinslend ştatında yerləşən Darling Downs Zooparkında baş verən dəhşətli hadisə zamanı bir qadın şirin hücumuna məruz qalaraq qolunu itirib.

Sonxeber.az xəbər verir verir ki, hadisə qadın zoopark əməkdaşlarını izləyərkən baş verib.

Təxminən 50 yaşlarında olduğu bildirilən qadın ağır yaralanıb. Təcili tibbi yardım briqadaları dərhal hadisə yerinə cəlb olunub və yaralı helikopterlə Brisben şəhərindəki Princess Alexandra Xəstəxanasına aparılıb. Həkimlər qadının vəziyyətinin stabil olduğunu bildiriblər.

Zooparkdan verilən rəsmi açıqlamaya görə, qadın hadisə zamanı şir qəfəsinin xaricində, sadəcə baxıcıları izləyirmiş. Hələlik səbəbi məlum olmayan bir şəkildə, şirlərdən biri qəfəsdən çıxmadan qadının qolunu tutaraq ağır şəkildə yaralayıb.

Zoopark rəhbərliyi heç bir heyvanın qəfəsdən çıxmadığını və digər ziyarətçilərin təhlükə altında olmadığını vurğulayıb. Hadisədən sonra polis və iş təhlükəsizliyi üzrə müvafiq qurumlar zooparka gələrək araşdırmalara başlayıblar. Rəsmilər bildiriblər ki, hadisənin dəqiq necə baş verdiyi qadının ifadəsi alındıqdan sonra tam şəkildə aydınlaşdırılacaq.

Qeyd edək ki, Darling Downs Zooparkı qısa müddət əvvəl şirlərlə xüsusi nəzarət altında keçirilən yaxın təmas proqramlarını sosial mediada tanıtmışdı. Bu proqramlar çərçivəsində ziyarətçilər müəyyən saatlarda dişi şirlərlə ünsiyyət qura bilirdilər və bu görüşlərin yüksək təhlükəsizlik tədbirləri ilə keçirildiyi qeyd olunurdu. Əldə olunan gəlirlə isə şirlər üçün yeni yaşayış sahəsinin inşa ediləcəyi planlaşdırılırdı.

Zoopark bir neçə iri pişik növünə, o cümlədən Cənubi Afrikadan gətirilmiş ağ şirlər, Sumatra pələngi və çiftləşdirmə proqramına daxil edilmiş Şri Lanka leoparları kimi nadir heyvanlara ev sahibliyi edir.

Hadisə səbəbilə zoopark bazar günü bağlanıb, lakin bazar ertəsi saat 09:00-dan etibarən yenidən fəaliyyətə başlayacağı elan olunub.

Telegramda izləyin