Ata-oğul mübahisəsi faciə ilə nəticələndi

İzmirin Ödemiş rayonunda ata və oğul arasında baş verən mübahisə qanlı sonluqla nəticələnib.

Sonxeber.az xəbər verir ki, gecə saatlarında Umurbey məhəlləsinin Balabanlı Yolu ərazisində Suat Yiğenli ilə atası Yılmaz Yiğenli arasında hələlik məlum olmayan səbəbdən mübahisə düşüb. Mübahisənin alovlanması nəticəsində Suat Yiğenli baltayla atasının başına zərbə endirərək onu ağır yaralayıb. Daha sonra isə o, kənd təsərrüfatında istifadə olunan zəhərli maddə içərək intihara cəhd edib.

Səhər saat 08:00 radələrində ailənin şəhər mərkəzindəki evindən Umurbeydəki bağ evinə gələn Hediye Yiğenli, həyat yoldaşı və oğlunu hərəkətsiz vəziyyətdə tapıb və dərhal qonşulardan kömək istəyib.

Hadisə yerinə çağırılan jandarma və təcili tibbi yardım qrupları tərəfindən aparılan araşdırmalarda Suat Yiğenlinin artıq həyatını itirdiyi müəyyən edilib. Ağır yaralanan ata Yılmaz Yiğenli isə Ödemiş Dövlət Xəstəxanasına aparılaraq müalicəyə götürülüb.

Məlumata görə, Suat Yiğenli bir müddət əvvəl psixoloji problemləri səbəbilə Manisa Ruhi Sağlamlıq və Xəstəliklər Xəstəxanasında müalicə alıb. Hadisə ilə bağlı araşdırma aparılır.

Telegramda izləyin