Mingəçevirdə 19 yaşlı sürücü süpürgəçi qadını vurdu, avtomobil aşdı: XƏSARƏT ALANLAR VAR

Mingəçevir şəhərində yol-nəqliyyat hadisəsi baş verib.

Oxu.Az xəbər verir ki, şəhər ərazisində 67 yaşlı süpürgəçi qadını maşın vurub.

Hadisə bu gün səhər saatlarında qeydə alınıb.

Belə ki, BMW markalı 99-FR-214 dövlət nömrə nişanlı avtomobilin sürücüsü, 2005-ci il təvəllüdlü Vüsal Salmanov hərəkətdə olarkən yolu süpürən 1958-ci il təvəllüdlü Ramella Ağayevanı vurub. Daha sonra isə idarəetmədən çıxan avtomobil aşıb.

Hadisə nəticəsində hər iki şəxs müxtəlif dərəcəli bədən xəsarətləri ilə xəstəxanaya çatdırılıb. Avtomobilə ciddi ziyan dəyib.

Faktla bağlı araşdırma aparılır.

Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, iyulun 19-u, saat 09:20-də baş verən yol-nəqliyyat hadisəsi ilə əlaqədar iki nəfər Mingəçevir Şəhər Mərkəzi Xəstəxanasının Təcili tibbi yardım şöbəsinə hospitalizasiya olunub.

"2005-ci il təvəllüdlü şəxsə (kişi cinsli) bədənin müxtəlif nahiyələrinin səthi travmaları diaqnozu təyin edilib. 1958-ci il təvəllüdlü pasiyentə (qadın cinsli) isə aşağı ətrafların səthi travmaları diaqnozu təyin edilib. Hazırda hər birinin müalicəsi davam etdirilir, vəziyyətləri stabildir", - deyə məlumatda bildirilir.

Telegramda izləyin