Sahibsiz iri buynuzlu heyvan qəza törətdi: 3 nəfər xəsarət aldı

İstanbulun Arnavutköy rayonunda sahibsiz iri buynuzlu heyvanın qəfil yola çıxması nəticəsində zəncirvari yol-nəqliyyat hadisəsi baş verib.

Sonxeber.az xəbər verir ki, motosiklet və minik avtomobilinin toqquşduğu qəza zamanı 3 nəfər xəsarət alıb, heyvan isə tələf olub.

Hadisə gecə saatlarında Arnavutköyün Bolluca məhəlləsində, Bolluca–İhsaniyə yolu küçəsində qeydə alınıb. İddialara görə, sahibsiz iri buynuzlu heyvan qəfil şəkildə yola çıxıb və hərəkətdə olan motosiklet ona çırpılıb. Zərbənin təsirindən motosiklet sürücüsü idarəetməni itirərək baryerlərin altına düşüb.

Qəzanı son anda görən kommersiya təyinatlı nəqliyyat vasitəsinin sürücüsü toqquşmanın qarşısını almaq üçün manevr etməyə çalışsa da, idarəetməni itirərək eyni heyvana çırpılıb. Heyvan hadisə yerində tələf olub, nəqliyyat vasitələrində isə ciddi maddi ziyan yaranıb.

Hadisə nəticəsində yaralanan 3 nəfər təcili tibbi yardım maşınları ilə yaxınlıqdakı xəstəxanalara çatdırılıb. Yaralılardan birinin vəziyyətinin ağır olduğu bildirilir. Polis əməkdaşları ərazidə təhlükəsizlik tədbirləri görərək yolu müvəqqəti olaraq nəqliyyatın hərəkəti üçün bağlayıb.

Sahibsiz heyvanın kimə məxsus olduğu hələlik müəyyən edilməyib. Hadisə ilə bağlı araşdırma aparılır.

Telegramda izləyin