"III Şuşa Qlobal Media Forumu Azərbaycanın strateji mövqeyini bir daha təsdiqlədi" - Deputat

Azərbaycan milli mətbuatının 150 illiyi ərəfəsində III Qlobal Media Forumu təkcə jurnalistika və informasiya texnologiyaları sahəsində deyil, həm də ölkənin geosiyasi gücünü və strateji baxışlarını nümayiş etdirən mühüm beynəlxalq platformaya çevrildi. "Rəqəmsal keçidlər: Süni intellekt dövründə informasiya və media dayanıqlılığının gücləndirilməsi" mövzusunda keçirilən tədbir həm texnoloji çağırışlara cavab baxımından, həm də Azərbaycanın artan diplomatik və informasiya nüfuzunun ifadəsi olaraq diqqət çəkdi.

Forum çərçivəsində Prezident İlham Əliyevin Xankəndidə media nümayəndələri ilə görüşü xüsusi məna daşıyır. Bu hadisə Azərbaycanın suverenliyinin, tarixi və mədəni irsinin bərpası ilə yanaşı, Xankəndinin artıq beynəlxalq dialoq və intellektual əməkdaşlıq mərkəzinə çevrildiyini göstərdi. Şuşa və Xankəndidə bu cür tədbirlərin təşkili həm simvolik, həm də praktik baxımdan Azərbaycanın informasiya və media sahəsində artan gücünün təzahürüdür.
Forumda əsas müzakirə mövzularından olan informasiya təhlükəsizliyi, rəqəmsal müstəqillik və süni intellektin media mühitinə təsiri qlobal kontekstdə olduqca aktuallıq kəsb edir. Prezident İlham Əliyevin də vurğuladığı kimi, ölkəmiz ərazi bütövlüyünü təmin etdikdən sonra yeni inkişaf mərhələsinə qədəm qoymuş və bu mərhələdə informasiya suverenliyinin qorunması prioritet məsələlərdən birinə çevrilmişdir. Azərbaycan informasiya sahəsində texnoloji yeniliklərə açıq olmaqla yanaşı, bu imkanları milli maraqlar çərçivəsində yönəltməyi bacarır.

Forum həmçinin media savadlılığı, yalan və manipulyativ informasiyaya qarşı mübarizə və süni intellektin jurnalistikada tətbiqi kimi məsələlərin dərin müzakirə olunduğu qlobal əhəmiyyətli platformaya çevrildi. Burada səsləndirilən ideyalar və təkliflər yalnız regional deyil, həm də beynəlxalq səviyyədə Azərbaycanın mövqelərini gücləndirəcək. Müasir dövrdə dövlətlərin gücü yalnız iqtisadi və hərbi resurslarla deyil, informasiya sahəsindəki üstünlükləri ilə də müəyyən olunur. Bu baxımdan Forum Azərbaycan üçün həm strateji, həm də ideoloji üstünlüyün təzahürüdür.

Prezident İlham Əliyev forum çərçivəsindəki çıxışında ölkəmizin siyasi sabitliyi, iqtisadi göstəriciləri və gələcəyə hesablanmış planları barədə ətraflı məlumat verdi. Azərbaycanın yerləşdiyi coğrafi məkanın yaratdığı imkan və çətinliklərə toxunan dövlət başçısı, ölkəmizin həm Avropa, həm də İslam aləmi ilə qurduğu əlaqələrin onu regional və beynəlxalq səviyyədə körpü rolu oynayan ölkəyə çevirdiyini bildirdi. Xüsusilə enerji və nəqliyyat sahələrində həyata keçirilən layihələr – o cümlədən Cənub Qaz Dəhlizi və Zəngəzur dəhlizi – Azərbaycanın iqtisadi və siyasi gücünün əsas dayaqları kimi qeyd olundu.

Eyni zamanda, Prezident İlham Əliyev ölkənin enerji sahəsindəki mövqeyinin nəinki iqtisadi, həm də ekoloji baxımdan uğurlu strateji kursa əsaslandığını bəyan etdi. Azərbaycanın "yaşıl enerji" sahəsində atdığı addımlar, xüsusilə Qarabağ və Şərqi Zəngəzurda istismara verilən su elektrik stansiyaları və günəş enerjisi layihələri ölkənin COP29 kimi beynəlxalq tədbirlərə ev sahibliyi etməsini əsaslandırır. Prezident İlham Əliyevin sözlərinə görə, artıq 6 giqavatlıq alternativ enerji istehsalı ilə bağlı müqavilələr imzalanmışdır ki, bu da ölkənin davamlı enerji siyasətinin uğur göstəricisidir.

Zəngəzur dəhlizi məsələsinə də toxunan Prezident İlham Əliyev, Ermənistanın bu layihəyə qarşı qeyri-konstruktiv münasibətinin regionda izolasiya risklərini artırdığını vurğuladı. Eyni zamanda, ABŞ Prezidenti Donald Trampın sülh təşəbbüslərinə verdiyi dəstəyə görə minnətdarlıq ifadə olundu və qeyd edildi ki, bölgədə sabitliyin təmin olunması üçün Ermənistan konstitusiyasının dəyişməsi və ATƏT-in Minsk qrupunun fəaliyyətinə son verilməsi vacibdir.
Prezident İlham Əliyev Azərbaycanın enerji siyasətinin tamamilə kommersiya prinsiplərinə əsaslandığını və siyasi alətə çevrilmədiyini vurğulayaraq, ölkənin Rusiya ilə enerji rəqabətinə girmədiyini, əksinə, hər zaman kommersiya maraqlarını ön planda tutduğunu bildirdi. Bu yanaşma Azərbaycanın beynəlxalq bazarlarda etibarlı tərəfdaş imicini daha da gücləndirir.

Forum zamanı dövlət başçısı Rusiya Federasiyasının hava məkanında vurulan AZAL təyyarəsi ilə bağlı məsələyə də aydınlıq gətirdi. Prezident İlham Əliyev bu məsələdə Azərbaycanın prinsipial mövqeyini açıqlayaraq, hadisənin tanınması, məsul şəxslərin cəzalandırılması və təzminat ödənilməsi ilə bağlı üç əsas tələb irəli sürdü. Qeyd olundu ki, Moskvanın bu istiqamətdə heç bir real addım atmaması səbəbindən məsələ artıq beynəlxalq hüquqi müstəviyə çıxarılıb.

III Şuşa Qlobal Media Forumu, ümumilikdə, Azərbaycanın dünya informasiya məkanında təşəbbüskar olduğunu təsdiqlədi. Forum çərçivəsində irəli sürülən ideyalar, qlobal çağırışlara verilən cavablar və strateji baxışlar bir daha sübut etdi ki, Azərbaycan bu gün təkcə regional deyil, həm də beynəlxalq miqyasda informasiya axınlarının, enerji təhlükəsizliyinin və siyasi təşəbbüslərin formalaşdığı önəmli mərkəzə çevrilib.

Şahin Seyidzadə
Milli Məclisin deputatı

Telegramda izləyin