73 yaşlı qadın ağrıyan ayağına ot bağladı, ikinci dərəcəli yanıqla xəstəxanalıq oldu

Erzurumun Uzundərə rayonunun Ulubağ kəndində yaşayan 73 yaşlı 6 uşaq anası Hatice Demir, bir həftə əvvəl ağrıyan sağ ayağını həkimə göstərmək əvəzinə, xalq arasında "su nanəsi" kimi tanınan bir otu qaynadaraq ayağına bağlayıb.

Sonxeber.az türk mediasına istinadən xəbər verir ki, otun təsiri ilə ağrısının keçəcəyini düşünən qadının vəziyyəti daha da pisləşib.

Ot sarğısından sonra ayağında şişlik və yanıq izləri görən Demir, yaxınlarının köməyi ilə Erzurum Şəhər Xəstəxanasına çatdırılıb. Burada ilkin tibbi müdaxilə aparıldıqdan sonra o, Yanıq Müalicə Mərkəzinə yerləşdirilib. Məlum olub ki, xəstənin ayağında ikinci dərəcəli dərin yanıq əmələ gəlib.

Hazırda müalicəsi davam edən Hatice Demir başına gələnlərdən peşman olduğunu bildirərək, "Kaş ki, həkimə getsəydim. Yanıq Mərkəzindəki həkim və tibb işçilərinə təşəkkür edirəm. Mənimlə çox gözəl maraqlanırlar. Heç kim belə işlərə əl atmasın. Ümid edirəm, tezliklə sağalıb evimə dönəcəyəm", – deyə bildirib.

Erzurum Şəhər Xəstəxanasının Yanıq Müalicə Mərkəzinin rəhbəri dosent doktor Ayetullah Temiz də açıqlamasında bu kimi halların son zamanlar tez-tez yaşandığını deyib:
"Xalq arasında müalicə məqsədilə istifadə olunan bəzi bitkilər əks təsir göstərə bilər. Bu cür üsullar nəticəsində ciddi yanıqlar və fəsadlarla qarşılaşan bir çox pasiyentimiz olub. Hətta əməliyyat və uzunmüddətli müalicə tələb edən hallar da müşahidə olunub. Vətəndaşlarımızdan xahiş edirik ki, bilmədikləri bitkiləri özbaşına istifadə etməsinlər və mütləq şəkildə həkimə müraciət etsinlər."

Telegramda izləyin