Meşə yanğınında şəhid olan Alperenin anasına son mesajı hər kəsi kədərləndirdi

Türkiyənin Eskişehir vilayətinin Seyitgazi rayonunda başlayaraq Afyonkarahisar sərhədinə qədər yayılan meşə yanğınlarına müdaxilə zamanı Arama-Kurtarma Dərnəyinin (AKUT) könüllüsü, 22 yaşlı Alperen Özcan şəhid olub.

Sonxeber.az türk mediasına istinadən xəbər verir ki, Özcanın anasına yazdığı son mesaj hər kəsi kədərləndirib.

Alperen Özcan mesajında anasına, "Söndürmə işləri yaxşı gedir. Əgər külək əks istiqamətdən əsib odu yenidən alovlandırmasa, bu gün bitirə bilərik" – sözlərini yazıb.

Məlumata görə, gənc könüllü atasının etirazlarına baxmayaraq, yanğın bölgəsinə getməkdə israr edib. Atası onun servisə çatmaması üçün yolda vaxt itirməyə çalışsa da, AKUT komandası Alpereni gözləyərək onu da aparıb.

Qeyd edək ki, Alperen Özcan daha əvvəl, 6 fevralda baş vermiş Kahramanmaraş zəlzələsində də xilasetmə işlərində iştirak edib. Onun tez-tez könüllü olaraq müxtəlif təbii fəlakətlərə müdaxiləyə qatıldığı qeyd olunub.

Alperenin yaxınları, xüsusilə də ailəsi onun vətən və insanlıq uğrunda göstərdiyi fədakarlıqla qürur duyduqlarını bildiriblər

Telegramda izləyin