Qadının evinə girən maskalı şəxs görün nə etdi

İspaniyanın Costa del Sol bölgəsində yaşayan bir qadın, evinə gizlicə girən bir şəxsin 32 dəqiqə boyunca evdə dolaşıb onu izlədiyini və dəhşətli anlar yaşatdığını bildirib.

Sonxeber.az türk mediasına istinadən xəbər verir ki, hadisə gecə saatlarında baş verib. Qadın yuxuda olarkən, evinə maskalı bir kişinin daxil olub və onun otağında gəzməyə başlayıb.

Səhər təhlükəsizlik kameralarını izlədikdən sonra baş verənləri öyrənən qadın, həmin şəxsin əl fənəri ilə bədəninə baxdığını və onu davamlı izlədiyini görüb.

"Kameraları izləyəndə şoka düşdüm. O adam məni davamlı izləyirdi. Bu, sadəcə bir oğurluq deyildi, sanki başqa bir məqsədi var idi", – deyə qadın bildirib.

Şübhəli şəxs evdən yalnız 300 avro olan pulqabını götürüb, digər qiymətli əşyalara və uşaqların otaqlarına toxunmayıb. Bu isə həmin şəxsin niyyətinin oğurluqdan daha təhlükəli ola biləcəyini göstərir.

Hadisədən sonra qadın ağır psixoloji travma yaşadığını bildirib: "Hələ də gecələr təkbaşına hərəkət edə bilmirəm. Evdə davamlı kameraları izləyirəm və psixoloji yardım almağa başlamışam. Bəs o gecə ayılıb onunla üz-üzə gəlsəydim? Nə olacağını düşünmək belə istəmirəm", – deyə qeyd edib.

Qadın təhlükəsizlik görüntülərini polisə təqdim edib və eyni zamanda sosial mediada paylaşaraq həmin şəxsin tapılması üçün kömək istəyib.

Polis hazırda həmin şəxsin axtarışlarını davam etdirir.

Qeyd edək ki, bu hadisə fonunda Marbella bölgəsində artan oğurluq halları ilə bağlı yerli əhali təhlükəsizlik tədbirlərini gücləndirməyə çağırılıb. Eyni bölgədə "San Pedro-nun Sinsi Oğrusu" kimi tanınan başqa bir şəxsin də dəbdəbəli villalara daxil olaraq on minlərlə avro dəyərində pul və saat oğurladığı bildirilir.

Telegramda izləyin