Miras üstündə ailə faciəsi: Ata iki oğlunu güllələdi – biri öldü, digəri ağır yaralı - VİDEO

Türkiyənin Adana şəhərində ailədaxili mübahisə faciə ilə nəticələnib. Miras üstündə başlayan mübahisə zamanı ata Erol Köse iki oğlunu döyüb, daha sonra tüfənglə onlara atəş açıb. Hadisə nəticəsində 42 yaşlı Nihat Köse həyatını itirib, 34 yaşlı qardaşı Mesut Köse isə ağır yaralanaraq reanimasiyaya yerləşdirilib.

Sonxeber.az türk mediasına istinadən xəbər verir ki, hadisə 24 iyul tarixində Adananın Seyhan rayonunun Gölbaşı məhəlləsində baş verib. İddiaya görə, 69 yaşlı Erol Köse ilə oğulları Nihat və Mesut arasında miras üstündə mübahisə yaranıb. Qısa zamanda mübahisə küçədə fiziki qarşıdurmaya çevrilib.

Ata Erol Köse Murad adlı oğlu ilə birlikdə digər oğulları Nihat və Mesutu döyüb. Hadisə yerindəki vətəndaşlar tərəfləri sakitləşdirməyə çalışsa da, Erol Köse evinə qaçaraq oradan ov tüfəngi gətirib və iki oğluna atəş açıb.

Qarnından güllələnən qardaşlar qan içində yerə yıxılıb. Ata hadisə yerindən qaçıb. Yaralılar sakinlər tərəfindən xəstəxanaya aparılıb. Həkimlərin müdaxiləsinə baxmayaraq, Nihat Kösenin həyatını xilas edə bilməyiblər. Ağır vəziyyətdə olan Mesut Köse isə əməliyyata alınıb və hazırda reanimasiyadadır.

Hadisə ilə bağlı təhlükəsizlik kameralarının görüntüləri də üzə çıxıb. Kadrlarda ata və Murat Kösenin Nihat və Mesuta hücum etdikləri, daha sonra Erol Kösenin evdən tüfəng gətirərək oğullarına atəş açdığı anlar aydın görünür. Ən şok edici məqam isə – Erol Kösenin vurduğu oğlunu yerə yıxdıqdan sonra təpikləməsi olub.

Ata saxlanıldı, digər oğlu axtarışdadır

Hadisədən sonra polis Erol Köse-ni evinin yaxınlığında saxlayıb. O, ifadəsi alındıqdan sonra məhkəməyə çıxarılıb və barəsində həbs-qətimkan tədbiri seçilib. Digər şübhəli Murat Köse isə hələ də axtarışdadır.

Öldürülən qardaşa təhdid mesajları göndərilib

İstintaq zamanı ortaya çıxan detallar isə hadisənin planlı ola biləcəyini göstərir. Belə ki, Murat Köse-nin hadisədən qısa müddət öncə fiziki məhdudiyyətli olan böyük qardaşı Nihat Köse-yə mobil telefon vasitəsilə təhqir və təhdid dolu mesajlar göndərdiyi məlum olub. Mesajlardan birində bu ifadələr yer alıb: "Səni gözləyirəm, mütləq gəl. Buraya gələcək cəsarətin varmı?"

Hazırda istintaq davam etdirilir.

Telegramda izləyin