Gənc qadın 2 ay əvvəl evləndiyi ərini qətlə yetirdi

Türkiyədə həyat yoldaşı ilə mübahisə edən 24 yaşlı Melek Başlı, 2 aylıq əri Ahmet Can Başlını bıçaqlayıb. Ağır yaralanan Başlı xəstəxanada dünyasını dəyişib. Qadın isə polis tərəfindən saxlanılaraq həbs edilib.

Sonxeber.az türk mediasına istinadən xəbər verir ki, hadisə avqustun 4-də Şəhidlərtəpəsi məhəlləsində yerləşən fərdi evdə baş verib. Ər-arvad arasında başlayan mübahisə qısa müddətdə davaya çevrilib. Melek Başlı mətbəxdən götürdüyü bıçaqla ərini bədəninin müxtəlif nahiyələrindən yaralayıb.

Səs-küyü eşidən qonşuların məlumatı əsasında əraziyə polis və təcili yardım briqadası cəlb olunub. Qan içində qalan Ahmet Can Başlıya ilkin tibbi yardım göstərildikdən sonra o, təcili yardım maşını ilə Tarsus Dövlət Xəstəxanasına aparılıb. Polis şübhəli qadını saxlayaraq polis bölməsinə aparıb. İstintaqdan sonra Melek Başlı məhkəməyə çıxarılıb və barəsində həbs qətimkan tədbiri seçilib.

Xəstəxanada əməliyyat edilən və reanimasiya şöbəsinə yerləşdirilən Ahmet Can Başlı isə gecə saatlarında həyatını itirib. Onun cəsədi məhkəmə-tibbi ekspertiza üçün Mersin Ədliyyə Tibb İnstitutuna aparılıb.

Telegramda izləyin