Ata və 11 yaşlı oğlu silahlı hücumun qurbanı oldu

Türkiyədə ata və 11 yaşlı oğlu silahlı hücum nəticəsində həyatını itirib.

Sonxeber.az türk mediasına istinadən xəbər verir ki, hadisə Konyada Karatay rayonunun Karaaslan məhəlləsində baş verib. Burada köhnə metal əşyaların alış-satışı ilə məşğul olduğu bildirilən Mehmet Koçyiğit və oğlu Servet Koçyiğit, yaşadıqları binanın həyətində avtomobillərinə minmək istədikləri vaxt odlu silahla hücuma məruz qalıblar.

Atəş nəticəsində Mehmet Koçyiğit bədənin müxtəlif nahiyələrindən, 11 yaşlı Servet Koçyiğit isə baş və kürək nahiyəsindən yaralanıb.

Məhəllə sakinlərinin xəbəri üzərinə əraziyə çoxlu sayda polis və təcili tibbi yardım briqadası cəlb olunub. Aparılan yoxlama zamanı Mehmet Koçyiğitin hadisə yerində öldüyü müəyyən edilib. Yaralı vəziyyətdə xəstəxanaya aparılan Servet Koçyiğit isə həkimlərin bütün səylərinə baxmayaraq, Konya Şəhər Xəstəxanasında dünyasını dəyişib.

Polis hadisəni törədən şəxs və ya şəxslərin saxlanılması üçün əməliyyatlara başlayıb.

Telegramda izləyin