Küçənin ortasında uşağı qaçırmaq istədi, vətəndaş mane oldu - VİDEO

Diyarbəkirdə naməlum şəxs 9 yaşlı oğlan uşağını qaçırmaq istəyib.

Sonxeber.az türk mediasına istinadən xəbər verir ki, hadisəyə müdaxilə edən vətəndaşın köməyi ilə uşaq şübhəlinin əlindən qurtulub. O anlar təhlükəsizlik kamerasına əks olunub.

Hadisə günorta saatlarında Yenişehir məhəlləsi, Lisə 1-ci küçəsində baş verib. Şübhəli şəxs azyaşlını köynəyindən tutaraq zorla aparmağa cəhd edib. Uşaq ağlayaraq kömək istədiyi anda ərazidə tikinti materialları satışı ilə məşğul olan Ahmet Aslan hadisəyə müdaxilə edib.

Şübhəli ilə Ahmet Aslan arasında mübahisə və qarşıdurma yaşanıb. Bu vaxt uşaq şübhəlinin əlindən qurtularaq qaçmağı bacarıb. Qarşıdurma zamanı Ahmet Aslan biləyindən xəsarət alıb, şübhəli isə hadisə yerindən qaçıb.

Məlumat verildikdən sonra polis əməkdaşları əraziyə göndərilib. Polis, yaxınlıqdakı obyektlərin təhlükəsizlik kameralarını araşdıraraq qaçan şübhəlinin kimliyini müəyyənləşdirmək və onu yaxalamaq üçün əməliyyatlara başlayıb.

Telegramda izləyin