Müştəri mayonez üstündə kafeni yandırdı, 3 nəfər yaralandı - VIDEO

İspaniyanın Sevilya şəhərində ağlasığmaz hadisə baş verib.

Sonxeber.az türk mediasına istinadən xəbər verir ki, kafedə çalışan ofisiantın "mayonez qurtarıb" deməsinə əsəbiləşən bir müştəri, obyektə benzin tökərək yandırıb. Hadisə zamanı üç nəfər, o cümlədən bir uşaq xəsarət alıb.

Məlumata görə, Los Palacios y Villafranca qəsəbəsində yerləşən Las Postas adlı kafeyə gələn 50 yaşlı kişi əvvəlcə iki sendviç sifariş edib və mayonez olub-olmadığını soruşub. Mənfi cavab aldıqdan sonra kafedən çıxan şəxs bir neçə dəqiqə sonra əlində 1,5 litrlik benzin şüşəsi ilə geri qayıdıb. O, insanların olduğu vaxtda bar hissəsinə benzin tökərək od vurub və dərhal hadisə yerindən qaçıb.

İspaniya mətbuatının yazdığına görə, şübhəli şəxsin yanında oğlu da olub. Kafeyə od vurduqdan sonra o, bir ofisiant tərəfindən təqib edilib və polis tərəfindən qısa müddətdə saxlanılıb.

Hadisə nəticəsində yaranan yanğın işçilər tərəfindən tez bir zamanda söndürülüb. Yaralanan 3 nəfərin vəziyyətinin yüngül olduğu bildirilib.

Şübhəlinin mülkiyyətə ziyan vurma, kundaklama və təhlükə yaratma maddələri üzrə məhkəmə qarşısına çıxarılacağı açıqlanıb.

Telegramda izləyin