"Azyaşlıların nişan mərasimini təşkil edənlərə cərimə tətbiq olunacaq" - AÇIQLAMA

"Yetkinlik yaşına çatmayan şəxsin nişanlanması və erkən nikah halları dövlət qurumları tərəfindən aşkarlandıqda, Azərbaycan Respublikasının İnzibati Xətalar Məcəlləsinin 189.1-ci maddəsinə əsasən 16 yaşına çatmayan şəxslərin evliliyinə dair sövdələşməyə daxil olmaq, onların nişanlanması inzibati xəta hesab olunur. Bu halda şəxsin barəsində İnzibati Xətalar Məcəlləsinin 189.1-ci maddəsinə əsasən 1000 manatdan 2000 manata qədər inzibati cərimə tətbiq edilir və ya şəxsin şəxsiyyəti nəzərə alınmaqla 1 aydan 2 aya qədər inzibati həbs cəzası müəyyən olunur".

Bu sözləri Sonxeber.az-a hüquqşünas Ramil Süleymanov danışıb.

O, açıqlamasında qeyd edib ki, ictimai iaşə obyektləri azyaşlıların nişan tədbirini keçirdikdə və hüquq-mühafizə orqanlarına məlumat vermədikdə, bu inzibati xəta hesab olunur:

"Azərbaycanda nişan mərasimləri adətən təntənəli şəkildə keçirilir, restoran və kafelərdə tədbirlər təşkil olunur. Əgər ictimai iaşə obyektləri azyaşlının bu kimi tədbirini qəbul edərsə və tədbirin təşkilatçılığını həyata keçirərsə, lakin hüquq-mühafizə orqanlarına məlumat verməzsə, bu da inzibati xəta hesab olunur.

Bu halda fiziki şəxslər 1000 manatdan 1500 manata qədər, vəzifəli şəxslər 3000 manatdan 4000 manata qədər, hüquqi şəxslər isə 6000 manatdan 9000 manata qədər cərimələnirlər. Sözügedən cərimələr Azərbaycan Respublikasının İnzibati Xətalar Məcəlləsinin 189.1-ci maddəsinə əsasən tətbiq olunur".

Telegramda izləyin