"Sözsüz ki, ailənin möhkəm olması təkcə gənclərdən asılı deyildir" - DEPUTAT

"Bu gün Azərbaycan cəmiyyətində, Azərbaycan dövlətində ailə dəyərləri, ailə institutunun möhkəm olması prioritet sahələrdən biridir. Cənab Prezident İlham Əliyevin nitqlərində bu məsələyə daim diqqət çəkir. Bu məsələ cəmiyyətdə çox aktualdı. Çox məyus edici haldı ki, Azərbaycan cəmiyyətində boşanmaların sayı çoxdur. Ona görə də gənclər ailə qurmadan öncə bütün bu məsələlərə diqqətlə yanaşmalıdılar".

Bu sözləri Sonxeber.az-a Milli Məclisin deputatı Şahin Seyidzadə danışıb.

O, açıqlamasında qeyd edib ki, Ailənin möhkəm olması Azərbaycan cəmiyyətinin sağlamlığı, dövlətinin sağlam olması deməkdir:

"Sözsüz ki, ailənin möhkəm olması təkcə gənclərdən asılı deyildir. Burada həm valideyn, həm təhsil, həmçinin də müasir innovasiya faktorlarını nəzərə almalıyıq. Bunun üçün gənclər arasında müxtəlif təşfiqi işlər aparılmalıdır. Amma gənclər özləri də ailə məsələsinə məsuliyyətlə yanaşmalıdır. Gənclər çox aydın şəkildə "ərə gedirəm", "evlənirəm" və "ailə qururam" arasında fərqi bilməlidilər. Ailə daimi "tikilən bina"dır. Və nə qədər çox o binada yaşayırsan tez-tez o binanı təmir etməlisən. Ona görə ailə qurmaq birdəfəlik bir addım deyil. Ailəni daimi inkişaf etdirmək lazımdır. Ailənin möhkəm olması Azərbaycan cəmiyyətinin sağlamlığı, dövlətinin sağlam olması deməkdir. Ailə institutu əsrlər boyu dövlətin, cəmiyyətin qlobal səviyyədə gedən proseslərdən asılı olmayaraq mövcud olub və mövcud da olacaq. Amma ona olan tələblər, ailə institutundan olan gözləntilər dəyişilib, yeni çağırışlar yaranıb və gənclər bu çağırışlara hazır olmalıdır".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Gender, ailə və demoqrafiya məsələlərinin işıqlandırılması" mövzusuna uyğun olaraq dərc edilir.

Telegramda izləyin