19 yaşlı gənc küçədə silahlı hücuma məruz qaldı - VİDEO

İstanbulun Maltepe rayonunun Gülsuyu məhəlləsində 5 sentyabr saat 00:30 radələrində dəhşətli hadisə baş verib.

Sonxeber.az türk mediasına istinadən xəbər verir ki, küçədə avtomobildən enən 4 nəfər, yolda gedən 19 yaşlı Kerem M.-yə silahla atəş açıb.

Gənc ayağından yaralanaraq qanlar içində yerə yıxılıb. Silahlılar isə eyni avtomobillə hadisə yerindən uzaqlaşıblar. Hadisə yerinə dərhal polis və təcili tibbi yardım əməkdaşları çağırılıb. İlkin tibbi yardımdan sonra yaralı Kerem M. xəstəxanaya aparılıb.

Polis hadisə yerində çoxsaylı giliz aşkarlayıb. Araşdırma zamanı hücum edənlərin H.K., A.Y., B.Y. və M.E.E. olduğu müəyyən edilib. Şübhəlilərdən A.Y. qısa müddətdə saxlanılıb və məhkəmənin qərarı ilə qəsdən xəsarət yetirmə, silah qanununu pozma və ictimai təhlükəsizliyi təhdid etmə maddələri üzrə həbs edilərək təcridxanaya göndərilib. Digər şübhəlilərin tutulması istiqamətində əməliyyatlar davam edir.

Hadisə anı ərazidəki bir iş yerinin təhlükəsizlik kamerasına düşüb. Görüntülərdə silahlı şəxslərin atəş açması və daha sonra sürətlə hadisə yerindən qaçması əks olunub.

Telegramda izləyin