"Yan gözlə baxma" üstündə silahlı davada 5 yaşlı uşaq həyatını itirdi

Türkiyənin Konya şəhərinin Karatay rayonunda iki qrup arasında "yan gözlə baxma" səbəbindən başlayan mübahisə silahlı davaya çevrilib.

Sonxeber.az türk mediasına istinadən xəbər verir ki, hadisə axşam saat 20:00 radələrində Şemsi Təbrizi məhəlləsinin Baba Sultan küçəsində baş verib. Məlumata görə, taksi ilə məhəlləyə gələn 3 nəfərlə Nedim Kaçın (19) və Ali Turan (18) arasında "yan baxma" üstündə mübahisə yaranıb.

Qısa müddətdə gərginləşən mübahisə davaya çevrilib və qarşı tərəfdən iki nəfər tapança ilə atəş açıb. Açılan atəş nəticəsində Ali Turan ayağından, Nedim Kaçın qarnından yaralanıb, həmin anda küçədə olan 5 yaşlı Yıldırım Kaçın isə boynundan güllə yarası alıb.

Şübhəlilər hadisə yerinə gəldikləri taksi ilə qaçıblar. Hadisə barədə məlumat alan polis və təcili tibbi yardım əməkdaşları əraziyə cəlb olunub. Yaralılar təcili tibbi yardım maşınları ilə Konya Numune Xəstəxanasına aparılıblar.

Həkimlərin bütün müdaxilələrinə baxmayaraq, Yıldırım Kaçın həyatını xilas etmək mümkün olmayıb. Vəziyyəti ağır olan Nedim Kaçın isə ilkin tibbi yardımdan sonra Meram Tibb Fakültəsinə köçürülüb.

Sağlıq durumu stabil olan Ali Turan ilkin ifadəsində hadisənin "yan baxma" üstündə baş verdiyini bildirib. Polis, hadisədən sonra taksi ilə qaçan şübhəlilərin kimliyinin müəyyənləşdirilməsi üçün əməliyyata başlayıb.

Telegramda izləyin