Veliefenddə rekord satış: "Torlak" adlı ərəb atının satıldığı qiymətə baxın

Türkiyənin Kənd Təsərrüfatı Müəssisələri Baş İdarəsinə (TİGEM) bağlı Anadolu Kənd Təsərrüfatı Müəssisəsi tərəfindən İstanbulun Veliefendi hipodromunda keçirilən hərracda "Torlak" adlı ərəb atı 5 milyon 250 min lirəyə satılıb. Bu satış bütün zamanların ən yüksək qiymətli at satışı kimi tarixə düşüb.

Sonxeber.az türk mediasına istinadən xəbər verir ki, hərrac zamanı 15 elit ərəb atı satışa çıxarılıb. Hibrit formatda təşkil edilən hərracda 14 at alıcı tapıb, 1 at isə satılmayıb.

Ən yüksək qiymətə satılan "Torlak" adlı at 5 milyon 250 min lirəyə alınıb.

Ən ucuz satılan at isə 1 milyon 300 min lirəyə alıcı tapan "Yalnızede" olub.

Ümumilikdə satışlardan 45 milyon 700 min lirə gəlir əldə olunub. TİGEM-in baş direktor müavini İsmail Bülbül açıqlamasında bildirib ki, 2024-cü ildə at satışları və yetişdiricilik gəlirləri ilə birlikdə təxminən 300 milyon lirə qazanc əldə ediblər:

"Bizim üçün hər uğur yeni bir mərhələ deməkdir. Bu il 400–500 milyon lirə gəlir hədəfləyirik və hazırda göstəricilər çox yaxşı gedir," – deyə Bülbül qeyd edib.

O, həmçinin bugünkü satışdan 45 milyon 700 min lirəlik gəlir əldə olunduğunu vurğulayaraq, "5 milyon 250 min lirəyə satılan atımız da oldu. İki həftə sonra keçiriləcək Sultansuyu Təsərrüfatı hərracı ilə mövsümü bağlamağı planlaşdırırıq," – deyə əlavə edib.

Telegramda izləyin