Qadın və kişi arasında saf dostluq mümkündürmü? – Psixoloqdan açıqlama

Cəmiyyətimizdə uzun illərdir müzakirə olunan mövzulardan biri qadın və kişinin dostluğunun mümkün olub-olmamasıdır. Bəziləri bu münasibəti təbii və sağlam sosial əlaqə forması kimi qəbul edir, digərləri isə belə dostluqların müəyyən mərhələdə emosional və ya romantik hisslərə çevrilə biləcəyini düşünür. Bəs, qadın və kişi arasında saf dostluq mümkündürmü? Bu münasibətləri formalaşdıran əsas psixoloji amillər hansılardır?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, emosiyalarını sağlam şəkildə təhlil edə bilən, qarşılıqlı hörmət və fikir mübadiləsi aparan insanların dostluq münasibəti qurması mümkündür:

"Kişi və qadın beyninin emosional reaksiyaları bir qədər fərqlidir. Qadınlar dostluq edərkən daha çox emosional yaxınlıq axtarırlar. Kişilər isə münasibətə daha çox ortaq fəaliyyət və ya təcrübə paylaşaraq dostluq qururlar. Belə bir fərq tərəflər arasında yanlış anlaşılmalara, yanlış siqnalların yaranmasına – daha sadə desək, qarşı tərəfin niyyətinin fərqli qavranılmasına səbəb ola bilər.

Bəs kişi və qadın arasında ümumiyyətlə saf dostluq mümkündürmü? Emosiyalarını sağlam şəkildə təhlil edə bilən, qarşılıqlı hörmət və fikir mübadiləsi aparan insanlar arasında bəli, mümkündür. Əslində, belə insanlar ruhən böyüyürlər. Amma bu, çox nadir hallarda baş verir.

Təmiz dostluq niyyətinin uzun müddət davam etməsi üçün bir tərəf digərini romantik obraza çevirməməlidir, münasibətə sosial basqı və ya qısqanclıq daxil olmamalıdır, qarşılıqlı hörmət balanslı şəkildə qorunmalıdır. Eyni zamanda, əks cinsin eynicinsli münasibət tərəfdarı olduğu hallarda da belə dostluqlar baş tuta bilir.

Kolleqa, tələbə, məktəb yoldaşlarını – yəni yoldaşlıq anlayışını – dostluq anlayışı ilə qarışdırmamaq lazımdır. Unutmaq olmaz ki, qadın və kişinin yaxın dostluq münasibəti çox vaxt ilk olaraq bir-birindən xoşlanma hissinin cəzb etməsi əsasında qurulur".

Vüsalə İbrahimli

Telegramda izləyin