MTV ilə bağlı cərimə protokolu yazıldı - Bu verilişə görə

Audiovizual Şura qohumlararası nikahla bağlı toy şənliyi yayımladığına görə MTV kanalı barəsində protokol tərtib edərək cərimə olunması üçün məhkəməyə müraciət edib.

Sonxeber.az xəbər verir ki, bu barədə Şura məlumat yayıb.

Belə ki, sözügedən kanalın efirində oktyabrın 22-si saat 20:31-21:24 arası yayımlanan "Toya gəlmişik" proqramının yayımı zamanı "Uşaqların zərərli informasiyadan qorunması haqqında" Qanunun 9.3-cü maddəsinin tələbi pozulub.

Həmin proqramın yayımı zamanı bölgələrin birində keçirilən qohumların (xalaqızı və xalaoğlunun) toy məclisi nümayiş etdirilib.

Məlumatda həmçinin qeyd edilib ki, bir neçə gün əvvəl digər yayımçı tərəfindən bu qəbildən pozuntu halı törədilib və Audiovizual Şuranın iclasında həmin yayımçıya xəbərdarlıq olunub. Həmin yayımçıya xəbərdarlıq olunanda bütün yayımçılardan diqqətli olmaları və bu istiqamətdə monitorinqlərin davam edəcəyi bildirilib: "Həmin haldan bir neçə gün sonra "MTV" kanalında yuxarıda qeyd olunan pozuntu halı baş verib. Məsələnin ciddiliyini nəzərə alaraq və yayımçıların bu məsələyə bir daha diqqətini cəlb etmək məqsədilə oktyabrın 24-də "MTV" kanalının aid olduğu "MUZ TV Azərbaycan" MMC-nin səlahiyyətli nümayəndəsi Audiovizual Şuraya dəvət edilib. Pozuntu faktına görə inzibati xəta haqqında protokol tərtib olunaraq müvafiq məhkəməyə göndərilib".

Qeyd edək ki, İnzibati Xətalar Məcəlləsinin 388-2.0.4-cü maddəsinə əsasən qeyd olunan pozuntuya görə hüquqi şəxslər üç min manatdan dörd min manatadək məbləğdə cərimə edilir.

Xatırladaq ki, ötən həftə Audiovizual Şura tərəfindən efirində qohum evliliyinə dair toy şənliyinin nümayişinə görə "Space TV" kanalına da xəbərdarlıq olunmuşdu.

Telegramda izləyin