Çernobildə itlər anidən mavi rəngə dönməyə başlayıb! Səbəb araşdırılır - VİDEO

Ukraynanın Çernobil bölgəsində yaşayan bəzi küçə itlərinin tükündə müşahidə olunan mavi rəng dəyişikliyi elmi dairələrdə narahatlıq yaradıb.

Sonxeber.az türk mediasına istinadən xəbər verir ki, sosial şəbəkələrdə paylaşılan görüntülərdə itlərin tüklərinin son günlərdə qeyri-adi şəkildə mavi rəngə büründüyü görünür. Videonu paylaşan "Dogs of Chernobyl" təşkilatı, həmin itlərin daha əvvəl bu rəngdə olmadığını bildirib.

Təşkilatın açıqlamasında qeyd olunur: "Ötən həftə bu itlər mavi deyildi. Bölgədə üç mavi tüklü it gördük. Niyə belə olduğunu bilmirik. Onları tutub müayinədən keçirmək üçün çalışırıq."

Könüllülərin ehtimalına görə, itlər çox güman ki, kimyəvi bir maddə ilə təmasda olublar. Sosial mediada yayılan müzakirələrdə bəzi istifadəçilər bunun radiasiya ilə bağlı ola biləcəyini iddia etsə də, təşkilat bu iddiaları rədd edib:

"Xeyr, tüklər radiasiya səbəbindən mavi olmayıb. Biz belə bir məlumat vermirik. Sadəcə olaraq, itlərin bəziləri mavi rəngli bir maddə ilə təmasda olublar. Bu həftə onları tutub, qısırlaşdırma və müalicə proqramımıza daxil etməyi planlaşdırırıq."

Xatırladaq ki, 2024-cü ildə Kolumbiya Universitetindən professor Norman J. Kleimanın rəhbərlik etdiyi araşdırma qrupunun apardığı tədqiqat nəticəsində Çernobil bölgəsindəki itlərin radiasiya, ağır metallar və müxtəlif ekoloji çirkləndiricilərə qarşı genetik dayanıqlıq inkişaf etdirdiyi müəyyən edilmişdi.

Hazırda alimlər mavi rəng dəyişikliyinin səbəbini müəyyənləşdirmək üçün itlərdən nümunələr toplayaraq laboratoriya analizləri aparırlar.

Telegramda izləyin